Ոստիկանական ստորաբաժանումները սահմանափակում են մեր տեղաշարժը, առայժմ չի հաջողվում ստանալ մանրամասն տեղեկություններ. Դանիելյան
Այսօր վաղ առավոտից «Հայաստան» խմբակցության գործընկերներիս հետ փորձել ենք շրջանցել ոստիկանական շղթաները՝ հասնելու Կիրանց, ծանոթանալու այնտեղ տեղի ունեցող իրադարձություններին՝ իր ֆեյսբուքյան էջում գրել է «Հայաստան» խմբակցության պատգամավոր Գառնիկ Դանիելյանը՝ հավելելով.
«Ի վերջո, կարողացանք այլընտրանքային ճանապարհով հասնել Կիրանց։
Նշեմ, որ այսօր ԱԱԾ-ն հայտարարություն էր տարածել, որ իրականացնում է ՀՀ պետական սահմանի պահպանությունը ստանձնելուն ուղղված նախապատրաստական աշխատանքներ, ինչի հետևանքով Կիրանցում հաշվառում չունեցող քաղաքացիների մուտքը բնակավայր սահմանափակվել է։
Առաջին անգամը չէ, երբ այս իշխանությունների կողմից հրահանգ է իջեցվում թույլ չտալու ինչպես քաղաքացիների, այնպես էլ՝ ՀՀ ԱԺ պատգամավորների մուտքը Կիրանց։
Ակնհայտ է, որ օրվա իշխանությունները փորձում են ավարտին հասցնել միակողմանի զիջումները։
Մեզ առայժմ չի հաջողվում ստանալ մանրամասն տեղեկություններ, թե կոնկրետ ինչ է տեղի ունենում այս պահի դրությամբ։
Այստեղ են ոստիկանական ստորաբաժանումները, որոնք ամեն քայլափոխի սահմանափակում են մեր տեղաշարժը։
Այդուհանդերձ, գործընկերներիս հետ շարունակում ենք մնալ կիրանցեցիների կողքին»։
Հետևեք մեզ Viber-ում
