Էրդողանին վիրավորելու համար լրագրողի դեմ հայց է բացվել

Թուրքական T24 առցանց թերթի փոխանցմամբ՝ Թուրքիայում երկու առանձին տարվող հետաքննության շրջանակներում հայց է բացվել լրագրող Ջենգիզ Չանդարի դեմ, որը մեղադրվում է երկրի նախագահ Ռեջեփ Էրդողանին վիրավորելու համար։ Խոսքը Radikal թերթում տարբեր ժամանակներում Չանդարի 7 հրապարակումների մասին է։ Դատական առաջին նիստը նշանակված է ապրիլի 7-ին։ Չանդարի գործը քննելու է Բաքըրքյոյի (Ստամբուլ) 2-րդ դատարանը։ Չանդարը տվյալ գործով հարցաքննվել էր դեռևս 2015 թվականի նոյեմբերի 27-ին։ Այժմ նրան սպառնում է Թուրքիայի ՔՕ 299-րդ հոդվածը (մամուլի միջոցով նախագահին վիրավորել) խախտելու համար 1-4 տարվա ազատազրկում։ Ջենգիզ Չանդարի հեղինակած այդ 7 հոդվածներից ուշագրավ է նախորդ տարվա հուլիսի 26-ին հրապարակած «Արդարացում. ահաբեկչության դեմ պայքար. նպատակը՝ հունիսի 7-ի ռևանշը», որը գրվել է այն բանից հետո, ինչ Էրդողանի կուսակցությունը հունիսի 7-ի ընտրությունների արդյունքներով չկարողացավ ստանալ միակուսակցական կառավարություն հիմնելու իրավունք։ Չանդարի մնացյալ 6 հոդվածները հրապարակվել են 2015 թվականի հուլիսի 26-ից օգոստոսի 19-ը։