Լուկաշենկոն ընդդեմ Ղարաբաղի ու հանուն Ալիևի հանգստության

Բելառուսի նախագահ Ալեքսանդր Լուկաշենկոն ընդգծել է, որ Ադրբեջանի հետ երկրի հարաբերությունները եղբայրական բնույթ են կրում, և հայտարարել է, որ մտադիր չէ արդարանալ Բաքվի հետ ռազմատեխնիկական ոլորտում համագործակցության համար: Լուկաշենկոն դա ասել է Մինսկում Ադրբեջանի պաշտպանության նախարար Զաքիր Հասանովի հետ հանդիպմանը.«Մենք ինքնիշխան անկախ պետություն ենք, և մենք իրավունք ունենք որոշել համագործակցության այն ուղղությունները, որոնք համապատասխանում են ժամանակի ոգուն, մեր պետությունների պահանջներին»: Իր հերթին Զաքիր Հասանովը բարձր է գնահատել Մինսկի հետ ռազմատեխնիկական համագործակցությունը և ռազմական նշանակության բելառուսական արտադրանքի որակը: «Դա գերազանց բելառուսական որակ է: Ադրբեջանի զինված ուժերն օգտվում են բելառուսական արտադրության սպառազինությամբ և տեխնիկայով, և ես ողջ պատասխանատվությամբ հայտարարում եմ, որ դա բարձրորակ զենք և ռազմական տեխնիկա է»,- ասել է նա: Բելառուսի նախագահն ընդգծել է բելառուսական կողմի պատրաստակամությունն օգնել Ադրբեջանի ժողովրդի անվտանգության ապահովմանը: Ալեքսանդր Լուկաշենկոն Ադրբեջանի պաշտպանության նախարար Զաքիր Հասանովի հետ քննարկել է երկու երկրների միջև ռազմատեխնիկական համագործակցության հեռանկարները: «Ես շատ լավ եմ հիշում, որ ծանր պահերին ձեր նախագահը միշտ թիկունք է կանգնել Բելառուս պետությանը,- ասել է Լուկաշենկոն ու հավելել. «Մենք դա շատ լավ ենք հիշում և պատրաստ ենք Ադրբեջանի համար անել ամեն բան, ինչ կարող ենք, որպեսզի ձեր ժողովուրդն ապրի անվտանգ, պետությունը զարգանա… Եվ բնականաբար, որպեսզի Ադրբեջանն իրեն զգա այնպես, ինչպես մենք՝ հանգիստ, հուսալի, պետք է ամրապնդել պաշտպանությունը: Ոչ մի նոր բան: Ուստի մենք ձեզ հետ աշխատում ենք այդ ուղղությամբ և կշարունակենք աշխատանքները»: Լուկաշենկոն նաև նշել է, որ սերտ հարաբերություններ ունի Ադրբեջանի նախագահի հետ՝ հույս հայտնելով, որ առաջիկայում իրենք կհանդիպեն: Դե ինչ, Հայաստանի մեկ այլ դաշնակից Բելառուսը, ի դեմս նախագահ Ալեքսանդր Լուկաշենկոյի, հերթական անգամ իր հավատարմությունն է ներկայացրել Ադրբեջանին, նրան զինելու հարցում: Բելառուսա-ադրբեջանական հարաբերությունների ջերմությունը նորություն չէ, պարզապես խնդիրն այն է, որ Հայաստանը գտնվում է այնպիսի կառույցներում, որոնց անդամ պետությունները գոնե ձևական չեն էլ փորձում չեզոքություն պահպանել: Ավելին՝ Հայաստանի հակառակորդ պետությանը զինելուն ու նրա հանգիստ անդորրը համարում են իրենց հիմնական անելիքը: Ի դեպ, նախօրեին հայտնի դարձավ, որ ՎՈՒԱՄ-ի շրջանակներում նախատեսվում է ստեղծել ազատ տնտեսական գոտի: ՎՈՒԱՄ-ի (Վրաստան, Ուկրաինա, Ադրբեջան, Մոլդովա) շրջանակներում փաստաթղթեր են նախապատրաստվում ազատ տնտեսական գոտի ստեղծելու շուրջ, հայտնել է Վրաստանի արտգործնախարար Միխեիլ Ջանելաձեն Թբիլիսիում ՎՈՒԱՄ արտգործնախարարների խորհրդի նիստին, հաղորդում է «Գրուզիա Օնլայնը»: «Մինչև տարեվերջ այդ ուղղությամբ սպասվում է տեղաշարժ»,- ասել է նախարարն իր ելույթում: Անդրադառնալով ՎՈՒԱՄ տարածությունում հակամարտություններին՝ նախարարը նշել է, որ դրանք պետք է լուծվեն «միջազգային իրավունքի նորմերի և տարածքային ամբողջականության հիման վրա»: Նրա խոսքով՝ այդ հակամարտությունները ՎՈՒԱՄ երկրների հիմնական խնդիրն են և վտանգ են ներկայացնում տարածաշրջանի անվտանգությանը: Ուշագրավն այն է, որ այս ձևաչափով հանդիպմանը Ուկրաինայի արտգործնախարարը Վրաստանին, Ադրբեջանին ու Մոլդովային առաջարկել է միավորվել ընդդեմ Ռուսաստանի: Թամար Բագրատունի