Գաղտնի բանակցություններ
Արդեն մի քանի շաբաթ է` Ադրբեջանի եւ ԱՄՆ-ի ներկայացուցիչները Վաշինգտոնում գաղտնի հանդիպումներ են անցկացնում, որտեղ քննարկում են լարված հարաբերությունները կարգավորելու երկու երկրների ցանկությունները:
Այս մասին հայտնում է minval.az լրատվական կայքը` հղում կատարելով արեւմտյան հուսալի դիվանագիտական աղբյուրներին: Նշվում է, որ կողմերը ցանկանում են քննարկվող հարցերը համաձայնեցնել մինչեւ ապրիլին Նյու Յորքում միջուկային գագաթաժողովի անցկացումը, որին պետք է մասնակցի նաեւ Ադրբեջանի նախագահ Իլհամ Ալիեւը:
Ըստ կայքի` ԱՄՆ-ի կողմից պատրաստված փաթեթով Վաշինգտոնը ցանկանում է, որպեսզի Ադրբեջանում ազատ արձակվեն բոլոր քաղաքական բանտարկյալները եւ վերականգնվի Բաքվում ԱՄՆ-ի ազգային ժողովրդավարական ինստիտուտի եւ հանրապետականների ինստիտուտի գործունեությունը: Բացի այդ, ԱՄՆ-ը մտադիր է հավասար աստիճանով անվտանգություն ապահովել Կասպից ծովում եւ մեծացնել Աֆղանստան ռազմական նշանակության բեռներ հասցնելու համար աջակցությունը: Քննարկվում է նաեւ Ադրբեջանում ԱՄՆ-ի ռազմական կոնտինգենտից սահմանափակ թվով քաղաքացիական անձանց տեղեկայելու հարցը: Կայքը գրում է, որ իր հերթին, Ադրբեջանը Վաշինգտոնի առաջ որոշ պայմաններ է դնում` սկսած Լեռնային Ղարաբաղի ֆինանսավորման դադարեցումից մինչեւ ԱՄՆ-ում որոշ հակաադրբեջանական շրջանակների գործունեությունը վերահսկողության տակ վերցնելը: «Ադրբեջանական կողմը դեռեւս քննարկում է այդ առաջարկները: Բայց քննարկման համար ժամանակը սահմանափակ է, որովհետեւ որոշումը պետք է ընդունվի մինչեւ Ալիեւի Նյու Յորք այցը», -նշել է աղբյուրը` հավելելով, որ եթե այդ ժամանակ նախագահներ Բարաք Օբամայի եւ Ալիեւի միջեւ դեմ առ դեմ հանդիպում տեղի չունենա, դա կնշանակի, որ կողմերը պայմանավորվածության չեն եկել:
Հետևեք մեզ Viber-ում
