Իսկական թուրքերի հավաքածու ա. Նաիրա Նահապետյանը՝«Երկիր ծիրանիի» անդամին

Երևանի ավագանու նիստն այսօր կրկին անցավ լարված մթնոլորտում: Նիստի ընթացքում Ռալֆ Յիրիկյանին շնորհվեց Երևանի պատվավոր քաղաքացու կոչում: «Երկիր Ծիրանի» խմբակցության ներկայացուցիչ Մարինե Խաչատրյանն իր խոսքում նկատեց, որ ավագանու նիստը մշակույթի երեկո չէ: «Բոլորն իրավունք ունեն իրենց կարծիքն արտահայտելու: Ես հենց այս գիշեր ևս մեկ մարդու կյանք եմ փրկել: Այս կոչումներն արժեզրկվել են, քանի որ տրվում են պատեհ, անպատեհ և  այն մարդկանց կողմից, ովքեր քանդում են մեր քաղաքը: Ամոթ է, որ Յիրիկյանը կոչում ստանա Երևանը քանդող քաղաքապետ Տարոն Մարգարյանի ձեռքից»- նշեց նա: «Ես հիմա նստած տեղս մտածում էի, եթե մենք էս կազմով քվեարկությամբ որոշեինք Հռիփսիմե եկեղեցին կառուցվի, թե՝ չէ, Չարենցն արժեք ունի, թե՝ չէ, օպերայի շենքն արժեք ունի, թե՝ չէ, ես համարում եմ, որ էլի դեմ մարդիկ կլինեին, ափսոս, որ մարդիկ կան, որոնք իրենց թույլ են տալիս բացարձակ արժեքների մասին խոսել»,- ասաց Լեւոն Իգիթյանն ու առաջարկեց ընդդիմադիրներին, որպեսզի արվեստի, ճարտարապետության մասին խոսելիս պատրաստվեն: «Հարց տվողներին եմ ուզում հարց տամ, իսկ դուք ի՞նչ եք արել ձեր ամբողջ կյանքի ընթացքում, որ իրավունք եք վերապահում Փելեշյանի մասին հարց տալ ընդամենը»,- հեգնեց Լեւոն Իգիթյանը՝ նշելով, որ իրեն թվաց, որ Ադրբեջանում է նստած: ՀՀԿ-ական Լևոն Իգիթյանի խոսքից հետո «Երկիր Ծիրանի» կուսակցության անդամները միջամտեցին, ինչին ի պատասխան Իգիթյանը նշեց. «Ես պատիֆոն չեմ, որ խոսում եմ, ձայնդ կտրի»: Երեւանի քաղաքապետ Տարոն Մարգարյանը Մարինա Խաչատրյանին խնդրեց չխանգարել նիստը, իսկ Հանրապետական խմբակցության անդամ Նաիրա Նահապետյանը տեղից նետեց. «Իսկական թուրքերի հավաքածու ա»: