Թուրքիան մեր երկիրն է. Կարո Փայլան
Թուրքիայի խորհրդարանի հայ պատգամավոր Կարո Փայլանի՝ Dalma News պարբերականին տված վերջին հարցազրույցը մեծ աղմուկ է հանել հայկական և թուրքական մամուլում: Պատգամավորը խոսել է հայերի, թուրքերի և ադրբեջանցիների համար բավականին զգայուն թեմաների մասին: Փայլանը նշել է, որ Թուրքիայում հայերն ազգային փոքրամասնություն են, 80 միլիոն բնակչություն ունեցող երկրում հայերի կազմում են միայն 60 հազարը: «Թուրքիայում հայերը սփյուռք չեն: Թուրքիան մեր երկիրն է, Հայաստանն այդ հարցով հստակ տեսլական պետք է ունենա»,- ընդգծել է Փայլանը: Բացի այդ, Փայլանի խոսքով, Թուրքիայում իսլամացված միլիոնավոր հայեր կան, ովքեր, ցավոք, չեն խոսում իրենց արմատների մասին: «Ես, իհարկե, հայ եմ, սակայն վատ եմ վերաբերվում ինչպես թուրք, այնպես էլ հայ ազգայնականներին, քանի որ ես պայքարում եմ Թուրքիայում խաղաղության և ժողովրդավարության համար: Ես խորապես համոզված եմ, որ դա տարածաշրջանի երկրների խաղաղ գոյակցության միակ հնարավոր ուղին է»,- հայտարարել է պատգամավորը: Ըստ նրա՝ երկխոսություն սկսելու համար անհրաժեշտ է, որ երկու երկրների մամուլը, պատգամավորները շփվեն միմյանց հետ, սակայն, ինչպես նշում է Փայլանը, Հայաստանն այժմ դրանից հեռու է: Փայլանը Հայաստանին և Թուրքիային կոչ է արել կարգավորել հարաբերություններն ու բացել երկու երկրների միջև սահմանները: «Եթե դու ապրում ես Թուրքիայում, դու ունես իրավունքներ, ապա պետք է հայտարարես դրանց մասին, պաշտպանվես և անհրաժեշտություն դեպքում պատասխանես հարձակումներին: Դա պետք է մտահոգի նաև Հայաստանին»,- նշել է Թուրքիայի խորհրդարանի հայ պատգամավորը:
Հետևեք մեզ Viber-ում
