Սերժ Սարգսյանի հետքայլը մեծ հարվածից առաջ

ԵԱՀԿ Մինսկի խմբի համանախագահները Երևան կատարած այցից առաջ՝ տարածաշրջանային այցն ավարտեցին Բաքվի հանդիպումներով: Ադրբեջանի նախագահ Իլհամ Ալիևի հետ հանդիպմանը ԵԱՀԿ Մինսկի խմբի համանախագահներ Իգոր Պոպովը (Ռուսաստան), Էնդրյու Շեֆերը (ԱՄՆ), Ստեֆան Վիսկոնտին (Ֆրանսիա) և ԵԱՀԿ գործող նախագահի անձնական ներկայացուցիչ Անջեյ Կասպրշիկը քննարկել են ղարաբաղյան հիմնախնդրի խաղաղ կարգավորման գործընթացն առաջ մղելու հնարավորությունները, այդ թվում ՝ Հայաստանի և Ադրբեջանի նախագահների հանդիպման կազմակերպման վերաբերյալ հարցերը, անդրադարձել ղարաբաղյան հակամարտության գոտում իրավիճակին: Հանդիպման մասնակիցները կարևորել են հակամարտության խաղաղ կարգավորմանն ուղղված հանձնառություններին կողմերի հավատարմությունը, ասվում էր Ադրբեջանի նախագահի աշխատակազմի տարածած հաղորդագրությունում: Բաքվում ավարտելով իրենց տարածաշրջանային այցը՝ Մինսկի խմբի համանախագահները հանդես եկան հայտարարությամբ, որում, մասնավորապես, նշել են, թե երկու նախագահները պատրաստակամ են՝ վերսկսել խաղաղ կարգավորմանը միտված բանակցությունները: Միջնորդները նշում են, որ հոկտեմբերի 6-ին հանդիպում ունենալով Հայաստանի, իսկ հոկտեմբերի 7-ին Ադրբեջանի նախագահի հետ` նպատակ են ունեցել ավարտին հասցնել երկու նախագահների հանդիպման նախապատրաստման աշխատանքներն ու հստակեցնել քննարկվելիք հարցերի շրջանակը: «Երկու նախագահներն էլ հաստատել են իրենց պատրաստակամությունը՝ վերսկսել բանակցությունները հակամարտության խաղաղ կարգավորմանը հասնելու նպատակով»,- համատեղ հայտարարության մեջ արձանագրում են միջնորդները: Հիշեցնենք, Երևանում Սերժ Սարգսյանի հետ հանդիպմանը միջազգային միջնորդները, ըստ պաշտոնական հաղորդագրության քննարկել էին «ղարաբաղյան հիմնախնդրի խաղաղ կարգավորման գործընթացն առաջ մղելու հնարավորությունները»: Համանախագահները Երևանում հանդիպում էին ունեցել նաև արտգործնախարար Էդվարդ Նալբանդյանի հետ: Հիշեցնենք, վերջին անգամ Սարգսյան-Ալիև հանդիպումը կայացել էր նախորդ տարվա հունիսին Սանկտ Պետերբուրգում, Ռուսաստանի նախագահ Վլադիմիր Պուտինի մասնակցությամբ, իսկ դրանից առաջ՝ մայիսին՝ Վիեննայում: Այսպես, Սարգսյանն ու Ալիևը վերսկսում են բանակցությունները: Կարելի է կանխատեսել, որ այդ հանդիպումը մինչև տարեվերջ կկազմակերպվի: Սակայն մի յուրահատկություն կա այդ հանդիպման կազմակերպման հարցում. արդյոք միջնորդները պահանջելո՞ւ են իրագործել սահմանային միջադեպերի հետաքննության մեխանիզմների ներդրումը, որն առավել ուժգնորեն դրվեց ապրիլյան պատերազմից հետո: Սա կարևոր հարց է, եթե հաշվի առնենք այն հանգամանքը, որ իրենց նախավերջին համատեղ հայտարարությունում միջնորդները չէին հիշատակել Վիեննայի և Սանկտ Պետերբուրգի հանդիպումներում ձեռքբերված պայմանավորվածությունների հարգումը, ինչը անակնկալ էր, և շատերի համար հիմք դարձավ կասկածելու, որ միջնորդները, թերևս, այլևս չհիշատակեն դրանց մասին: Իսկ սա չափազանց կարևոր պահ է, քանի որ պաշտոնական Երևանը այդ պահանջի կատարումն էր պնդում մեկ տարուց ավելի, և ըստ էության, որպես բանակցությունների սկսման պայման էր դնում: Այսպես, գլխավոր ինտրիգը մնում են Վիեննայի և Սանկտ Պետերբուրգի հանդիպումների պայմանավորվածությունները, եթե դրանց մասին չհիշատակվի Սարգսյան-Ալիևի առաջիկա հանդիպման արդյունքում, ուրեմն, կարելի է եզրակացնել, որ Բաքվին հաջողվել է կրկին առավելություն ստանալ, քանի որ Հայաստանը հետ է կանգնել իր դիրքորոշումից և այլևս չի պնդում այդ պահանջների կատարումը: Մետաքսյա Շալունց