Սատանայի փաստաբանները՝ բարի կամքի ասպետների քղամիդ հագած...

Բացառիկ օպերատիվությամբ մի «մարտական» կարևոր գործողություն էլ սատանայի փաստաբաների ձեռամբ իրականացվեց...

Որպես բարի կամքի դրսևորում Հայաստանն այսօր որոշում կայացրեց ադրբեջանցի զինծառայողին հանձնել ադրբեջանական կողմին։ Ընդ որում,՝ որոշման կայացմանը մեկ մարդու նման ներգրավված ուժային կառույցների ղեկավարները՝ սատանայի փաստաբանները, միանգամից վերածվեցին ադրբեջանական մոլորյալ զինվորի իրավապաշտպանական խմբի։ Յուրաքանչյուրն իր հանձնարարությունը ստացավ վերին օթյակից և անխոս կատարեց։

Հընթացս, բնականաբար եղան քավության նոխազներ, բայց դա երկրորդական-երրորդական նշանակություն ունի․ կարևորն այն է, որ սատանայի հանձնարարությունը կատարվեց։ Եվ կատարվեց մարտի 5-ի օրը։

Առաջանցիկ հայտարարության հեղինակը ՔԿ-ն էր, ըստ որի՝ փետրվարի 28-ին ժամը 5․10-ի սահմաններում Սյունիքի մարզի Տեղ գյուղում հայտնաբերված զինծառայողը, պարզվում է՝ բնավ էլ քրեական հոդվածներով չի անցնում։ ՔԿ-ն, մոլորյալ գառան կերպարանքով ներկայացնելով ալիևյան բանակի զինվորին, ձևակերպեց վերին հրահանգը, թե՝ տղան խնդիրներ է ունեցել ծառայակիցների հետ, այդ պատճառով մոլորվել է։ Այստեղ միջանկյալ մի դիտարկում անհնար է չանել․ պարզվում է՝ ադրբեջանցի զինվորները ծառայակիցների հետ խնդիրներ ունենալիս՝ ՀՀ սահմանն են անցնում, չէ՞ որ այն անվտանգ է, իսկ մեր զինվորները՝ անհասկանալի կերպով՝ միանգամից ինքնասպան են լինում։

Ինչեւէ, ՔԿ-ն միջնորդություն ներկայացրեց հսկող դատախազին՝ թշնամու զինվորի նկատմամբ հարուցված քրեական հետապնդումը դադարեցնելու մասին։

Իհարկե, սատանայի այս փաստաբանն էլ առանց խոսքի բավարարել է միջնորդությունը, կատարելով՝ սատանայի կամքը։ Բարի կամքը ու դադերեցրել հետապնդումը։ ԱԱԾ-ն էլ շտապես բավարարել սատանայի մեկ այլ բարի կամք ու հայտարարել է, թե թշնաու դիվերսանտին հանձնում են տերերին։

Այս պատմությանն ուղղակի հաստատում է, որ Հայաստանի անվտանգության համար պատասխանատու թիվ 1 ուժային կառույց ԱԱԾ-ն չի գիտակցում իր դերն ու նշանակությունը որպես պետության ազգային անվտանգության ծառայություն։ Այն ուղղակի իրեն սատանայի կամքը կատարողի դեր վերապահելուց այն կողմ չի պատկերացնում։ Այլապես, ո՞նց կարող էր ԱԱԾ-ն ադրբեջանցի դիվերսանտին իր պետությանը հանձնելու մասին տեքստ հրապարակել։ Ընդ որում, այն ներկայացնելով որպես բարի կամքի դրսևորում։

Ոչինչ, հերն էլ անիծած, որ որբի գլուխ դարձած երկրի անտեր մնացած բազմաթիվ զինվորներ ադրբեջանական բանտերում են արդեն չորս տարի: Նրանք էլ հո ալիևի պես տեր չունե՞ն։ Նրանց անտերությու՛նն է բաժին ընկել։ Վերից վար․․․

Կարո՞ղ էր Հայաստանը բարձրացնել մեր զինծառայողների վերադարձի խնդիրը։ Իհարկե, կարող էր։ Կարող էր, բայց՝ չարեց։ ԱԱԾ-ն ճիշտ հակառակն արեց, քննչական կոմիտեն իր իսկ հայտարարությանը չկարողացավ անգամ տեր լինել, ուր մնաց թե՝ ի շահ մեր զինվորի մի բան կարողանար անել։

Ս․թ․ փետրվարի 28-ին՝ ժամը 05։15-ի սահմաններում, Սյունիքի մարզի Տեղ համայնքի հատվածում ՀՀ ՊՆ զինծառայողների կողմից հայտնաբերված Հայաստան-Ադրբեջան պետական սահմանը հատած ադրբեջանական զինված ուժերի զինծառայող Ռուսլան Էլդանիս-Օղլու Փենախովի հանձնումն ադրբեջանին ՀՀ ուժային կառույցների խայտառակությունն է։ Ընդ որում, մարտի հինգին, Վազգեն Սարգսյանի ծննդյան օրը։

Բայց սատանայի կարևոր փաստաբաններից մեկը մի տեսակ ստվերում մնաց։ Թեպետ, սահմանախախտ ադրբեջանցու քրեական վարույթը դադարեցնելու հսկողությունը, այդ համատեքստում վերջնական գնահատականը, որոշումը հետապնդումը դադարեցնելու մասին հենց նրա՛նն է։ ՀՀ գլխավոր դատախազինը։

pastinfo.am