Հայաստանը ձգտում է «դարպաս» դառնալ.Արա Աբրահամյան

«Եվրասիական գործընկերության միջազգային համաժողովի» կազմակերպիչ, Ռուսաստանի հայերի միության նախագահ Արա Աբրահամյանը ելույթ է ունեցել «Եվրասիական գործընկերության միջազգային համաժողովին»: Ելույթում ասված է. «Մեր առաջին համաժողովը կայացել է անցյալ տարի՝ Երևանում և մեծ հետաքրքրություն է առաջացրել միջազգային հանրության շրջանում: Առաջին համաժողովին մասնակցել է 37 երկրի ավելի քան 800 մասնակից: Այս համաժողովին մենք ունենք է՛լ ավելի շատ հյուրեր: Մեր երկրորդ համաժողովի հիմնական թեման է «Արդյունաբերական ինտեգրացիան և արտահանման-ներմուծման հնարավորությունների ընդլայնումը Եվրասիական գործընկերության երկրներում»: Մեր խնդիրն է նպաստել երկկողմ ու բազմակողմ տնտեսական համագործակցությանը, հող ստեղծել ԵԱՏՄ, ԱՊՀ անդամ երկրների, BRICS-ի հինգ անդամ երկրների (Բրազիլիա, Ռուսաստան, Հնդկաստան, Չինաստան, Հարավային Աֆրիկա), Ամերիկայի Միացյալ Նահանգների և այլ երկրների կառավարությունների ու գործարար համայնքների միջև բազմակողմ և նշանակալից գործարքներ իրականացնելու համար: Համաժողովի աշխատանքը նպատակաուղղված կլինի արդյունավետ լուծումների բացահայտմանը, որոնք խթանում են տարածաշրջանային տնտեսական համախմբումը և ներդրումային հոսքերի ավելացմանը նպաստող բաց նորարարությունների զարգացումը: Ես կցանկանայի ընդգծել մեր համաժողովի չորս հիմնական նպատակները: Առաջինը ԵԱՏՄ-ի տնտեսական ներուժի, այդ թվում նաև անդամ պետությունների տնտեսական գործունեության մասին իրազեկության բարձրացումն է: Երկրորդը՝ տարածաշրջանային և ազգային գործարար ու ներդրումային հնարավորությունների խթանումը: Երրորդը՝ համաժողովը թույլ կտա ընդլայնել և խորացնել երկկողմ և բազմակողմ հարաբերությունները, ԵԱՏՄ, ԱՊՀ, ՇՀԿ անդամ երկրների գործարար համայնքների միջև բիզնես նախագծերի իրականացումը: Եվ չորրորդը՝ երկկողմ և բազմակողմ կապերի հաստատումը բիզնես համայնքների միջև: Կարելի է վստահորեն ասել, որ Եվրասիական տնտեսական միությունը, որի ծրագրերը մենք խթանում ենք համաժողովի ընթացքում, ներկայումս հանդիսանում է ամենահաջողված ինտեգրացիոն նախագծերից մեկը: Վերջին տարիներին ԵվրԱզԷՍ-ի բոլոր երկրներում մակրոտնտեսական ցուցանիշները զգալիորեն բարելավվել են: Գործընկերության սահմաններում լուծում է ստացել սոցիալ-տնտեսական խնդիրների ամենալայն շրջանակը: Մասնակից պետությունների միջև ապրանքաշրջանառությունն ավելացել է ավելի քան չորս անգամ: Մեր համագործակցությունը ամրապնդվեց, Եվրասիական տնտեսական միության հեղինակությունն աճեց համաշխարհային ասպարեզում: Մեր հաջողությունները զարգացնելու համար մենք պետք է վերածենք Եվրասիան «խելացի» կառավարվող տարածաշրջանի, այսինքն, մի տարածաշրջանի, որտեղ կկիրառվեն նորարարություններն ու հատուկ մասնագիտացումները: Եթե յուրաքանչյուր երկիր ինտեգրացիայի համար առաջարկի իր լավագույն ռեսուրսները, տաղանդներն ու հնարավորությունները, ապա ոչինչ չի կարող կանգնեցնել «խելացի» կառավարվող տարածաշրջանի տնտեսական աճը: Եթե մենք համախմբենք Ռուսաստանի արդյունաբերական հզորությունը, Ղազախստանի բնական պաշարները, Բելառուսի և Ղրղզստանի աշխարհագրական առավելությունները, ինչպես նաև բոլոր մասնակից երկրների մարդկային և մտավոր ռեսուրսները, ապա շուտով մենք կդառնանք ոչ միայն «խելացի», այլև բարգավաճ տարածաշրջան: Հայաստանը մտադիր է միանալ ընդհանուր ջանքերին և իր ներդրումն այդ գործում դարձնել նշանակալից և անփոխարինելի: Չնայած նրան, որ իմ հայրենիքը տարածքով փոքր է և հարուստ չէ բնական պաշարներով՝ Հայաստանը հարուստ է հնադարյան մշակույթով, կիրթ և աշխատասեր ժողովրդով, վառ և տաղանդավոր երիտասարդներով, ինչպես նաև հայկական սփյուռքի տնտեսական և գիտատեխնիկական ռեսուրսներով: Ելնելով այս ամենից՝ Հայաստանը ձգտում է դառնալ Եվրասիական տնտեսական միության, իսկ ապագայում նաև ողջ Կենտրոնական Ասիայի տեխնոլոգիական և ֆինանսական կենտրոն՝ դառնալով «Նոր Մետաքի ճանապարհի», այսպես կոչված,«դարպասը»: Նորարարությունները, ինտեգրացիան և ոչ ստանդարտ մտածողությունը Հայաստանը կդարձնեն Եվրասիական տնտեսական միության եռանդուն և բարգավաճ խաչմերուկ: Համաժողովին նույն սեղանի շուրջ մենք համախմբում ենք ներդրողների, գործարարների, գիտնական-գյուտարարների և կառավարության ներկայացուցիչների՝ բյուրոկրատական գործընթացը նվազեցնելու և առավել համարձակ ու առաջատար նորարարությունների, ներդրումների և համատեղ տնտեսական նախաձեռնությունների համար կանաչ լույս ապահովելու նպատակով: Մինչև այս համաժողովը Եվրասիական տնտեսական միությունը գոյություն ուներ և գործում էր միջազգային գործարարներից առանձին: Համաժողովը նրանց համար մշտական, ակտիվ և փոխշահավետ համագործակցության սկիզբը կդառնա: Հուսով եմ, որ համաժողովը, որին պատիվ եմ ունեցել Ձեզ հրավիրել, տնտեսական շարժիչ կդառնա բոլոր այն երկրների համար, որտեղից եկել են մեր պատվարժան հյուրերը, և բոլոր այն բիզնեսների համար, որոնցով նրանք զբաղվում են: Հուսով եմ նաև, որ մեր համաժողովը կկարողանա օգտագործել տնտեսությունը մեզ իրարից բաժանող հակամարտությունների լուծման համար: Այս համաժողովի ընթացքում մենք շարունակում ենք ձևավորել նոր ապագա Եվրասիայի համար»: