ՔՊ-ն Երեւանով է հետաքրքրվում

«Հրապարակ» թերթը գրում է. «Երեւանի քաղաքապետ Տիգրան Ավինյանը եւ նրա ՔՊ-ական 3 տեղակալները երեկ ԱԺ-ում փակ հանդիպում են ունեցել ՔՊ խմբակցության հետ։ Նախաձեռնողը եղել են պատգամավորները՝ քննարկելու մայրաքաղաքային խնդիրները: Մեծ թվով պատգամավորներ են մասնակցել, այդ թվում` գործարար-պատգամավոր Խաչատուր Սուքիասյանը, ով լարված հարաբերություններ ունի Ավինյանի հետ։ ՔՊ-ականներն ավելի քան 3 ժամ հարցախեղդ են արել Ավինյանին:

Հարցերի մի խումբը վերաբերել է տարեվերջյան աղմկահարուց որոշմանը՝ կարմիր գծերի վճարների շեշտակի թանկացմանը։ Հետաքրքրվել են՝ արդարացվա՞ծ է այդ որոշումը, որի նպատակը քաղաքի կենտրոնը բեռնաթափելն է, Ավինյանը պատասխանել է, որ դեռ չունեն ամբողջական պատկեր, քանի որ ամանորյա արձակուրդները դեռեւս լիարժեք չեն ավարտվել, բուհերում դասերն ամբողջությամբ չեն վերսկսվել, ուստի չեն կարող այդ հարցին հստակ պատասխանել։

Անդրադարձել են Օղակաձեւ զբոսայգու խնդրին, մասնավորապես թենիսի կորտերին։ Ավինյանը թիմակիցներին վստահեցրել է, որ մոտ ապագայում դրախտային զբոսայգի են ունենալու այդ տարածքում, իսկ կորտեր կկառուցեն «Մայր Հայաստան» արձանի հարեւանությամբ։ Պատգամավորները հետաքրքրվել են՝ իսկ ինչո՞ւ է առանց մրցույթի արվում` Էվոկաբանկի միջոցով: Ավինյանն ասել է, թե պատասխանատու հայտարարություն եմ անում՝ եթե կգտնվի մեկը, ով պատրաստ կլինի 9 միլիոն դոլար ներդնել, ծրագիրը կհանձնի այդ ընկերությանը։ Ներկայացվել է նաեւ աշխատանքի հաշվետվություն»:

Առավել մանրամասն թերթի այսօրվա համարում