Աջ ղեկով մեքենաների ճակատագիրը. ինչ է սպասվում վարորդներին
Այսօր ԱԺ-ում ուշագրավ հայտարարություն արեց Տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը: ՀՀԿ պատգամավոր Կարինե Աճեմյանը ԱԺ- կառավարություն հարցուպատասխանի ժամանակ հարցրեց՝ ճի՞շտ է, որ կառավարությունում քննարկում է եղել աջ ղեկով մեքենաների շահագործումն արգելելու մասին:
«Քննարկումներ եղել են, քննարկումների արդյունքում ոչ մի որոշում ընդունված չէ` ինչպես շարունակել այդ նախագիծը: Մենք առաջին հերթին փորձում ենք անդրադառնալ ճանապարհային անվտանգության և մարդկանց անվտանգության խնդիրներներին», - ասաց նախարարը:
Նա նշեց` կուսումնասիրվի ոստիկանության տրամադրած վիճակագրությունը վթարների ու դրանց աջ ղեկով մեքենաների մասնակցության վերաբերյալ:
Նա ասաց, որ դեռ որոշում վերջնական չեն ընդունել, բայց առաջին հերթին փորձում են ճանապարհային անվտանգության խնդիրները լուծել. «Հաշվի առնելով ոստիկանության կողմից ներկայացված վթարների քանակը, թե որ տոկոսն է կազմում աջ ղեկով մեքենաների մասնակցությամբ վթարները, հաշվի առնելով այդ ամենը՝ կունենանք որոշման նախագիծ, որը կքննարկվի նաեւ ԱԺ խմբակցություններում: Առաջին հերթին մենք մոտենում ենք մարդկանց անվտանգության խնդիրներից: Ժամանակին ՀՀ-ն ընդունել է աջակողմյան երթեւեկության կանոնները, այսինքն՝ ղեկը պետք է լինի ձախ կողմից եւ մենք պետք է սահմանված օրենքին համապատասխան մեքենաներ ունենանք: Կունենանք ինչ-որ որոշման նախագիծ, որը կքննարկվի ԱԺ խմբակցություններում ու կներկայացնենք Կառավարություն», - ասաց Վահան Մարտիրոսյանը:
Հետևեք մեզ Viber-ում
