Վարդան Հարությունյանը «Մուլտի Գրուպ» և «Քեթրին գրուպ» ընկերություններում ստուգումների մասին
ԱԺ պատգամավոր Գագիկ Ծառուկյանի ընտանիքին պատկանող «Մուլտի գրուպի» կազմի մեջ մտնող ընկերություններում հարկային ստուգումները տարեկան ստուգումներ են: Այսօր այս մասին ասաց պետեկամուտների կոմիտեի նախագահ Վարդան Հարությունյանը՝ տարեկան ամփոփիչ ասուլիսի ժամանակ: ՊԵԿ նախագահ Վարդան Հարությունյանը նշեց, որ օրինապահ հարկ վճարողի կարգավիճակ տրվում է այն ընկերություններին, որոնք սահմանված չափանիշներին համապատասխան են գործում: «Մուլտի Գրուպ» և «Քեթրին գրուպ» ընկերություններն օրինապահ հարկ վճարողի կարգավիճակ ինչո՞ւ չեն ստացել, հարցին ի պատասխան Վարդան Հարությունյանը նշեց, թե պատճառը միգուցե որոշ չափորոշիչների չբավարարելն է: Հարցին, թե՝ ի՞նչ հիմքերով են ստուգումներ սկսվել «Մուլտի գրուպում» եւ «Քեթրին» ընկերությունում, պարոն Հարությունյանն ասաց, որ բոլոր ընկերությունների ստուգման գործընթացը տարեկան հաստատված ծրագրով է իրականացվում եւ ՊԵԿ-ը որեւէ միջամտություն չունի. «Համակարգիչն ընտրում է ռիսկային ընկերություններին, որոնք պետք է տվյալ տարում ստուգումներ կատարվեն»: ՊԵԿ նախագահի խոսքերով՝ «Մուլտի գրուպն» ու «Քեթրինը» անցյալ տարի ներառված են եղել 2017 թվականի ստուգումների ցանկում, ուստի այս տարի պետք է ստուգվեին: «Ընդհանրապես, բոլոր ընկերությունների ստուգման գործընթացը կանոնակարգվում է տարեկան հաստատված ծրագրով, որի վրա որևէ գործուն միջամտություն մենք չենք ունենում և այդտեղ որևէ արտառոց բան չկա»,- նշեց նա։
Հետևեք մեզ Viber-ում
