Բեկումից մեկուկես ամիս առաջ

Եվրոպական հանձնաժողովի հարևանության և ընդլայնման հարցերով հանձնակատար Յոհաննես Հանը երեկ Երևանում բանակցություններ էր վարում ՀՀ իշխանությունների հետ: Նա կարևոր միտք է շեշտել. լինելով ԵԱՏՄ անդամ՝ Հայաստանը կարող է խորացնել հարաբերությունները ԵՄ հետ: ՀՀ ԱԳ Էդվարդ Նալբանդյանի հետ համատեղ ասուլիսում Յոհաննես Հանը հավաստիացրել է, որ Հայաստանն ու Եվրամիությունը շուտով կստորագրեն Համապարփակ և ընդլայնված գործընկերության համաձայնագիրը: «Եվրամիությունն ու Հայաստանը շուտով կստորագրեն Համապարփակ և ընդլայնված գործընկերության համաձայնագիրը: Այս փաստաթուղթը՝ Եվրամիության ու Հայաստանի միջև համաձայնեցված գործընկերության առաջնահերթությունների փաստաթղթի հետ միասին, կխորացնեն մեր համագործակցությունը: Թույլ տվեք ասել, որ համաձայնագիրը առաջին նմանատիպ փաստաթուղթն է, որը ստորագրվելու է Արևելյան գործընկերության երկրների հետ, և Հայաստանը այդ երկրներից առաջինն է, որ ավարտին է հասցրել գործընկերության առաջնահերթությունները Եվրամիության հետ: Մենք շահագրգռված ենք տեսնել, թե այս նոր համաձայնագիրը ինչպես է կյանքի կոչվելու, որովհետև սա նախագիծ է այլ հնարավոր հարաբերությունների համար: Հայաստանի հետ կնքվելիք համաձայնագրի կարևորությունը դուրս է գալիս Երևանի հետ երկկողմ հարաբերությունների դաշտից», - ասել է Եվրահանձնաժողովի բարձրաստիճան պաշտոնյան: 2013թ. սեպտեմբերի 3-ին Մոսկվայում ՌԴ նախագահ Վլադիմիր Պուտինի հետ բանակցությունների արդյունքում նախագահ Սերժ Սարգսյանը շատերի համար անակնկալ հայտարարեց Կրեմլի նախաձեռնած մաքսային միությանը Հայաստանի անդամակցության մասին՝ դրանով իսկ անհնար դարձնելով Եվրամիության հետ նույն տարում նախատեսված ասոցացման համաձայնագրի ստորագրումը, Երևանի ու Բրյուսելի միջև նոր համաձայնագրի ստորագրման համար փաստորեն չորս տարի պահանջվեց: «Այս նոր համաձայնագիրը կցուցադրի, որ Հայաստանի համար հնարավոր է եվրասիական ինտեգրացիոն գործընթացի մաս լինել ու միաժամանակ Եվրամիության հետ հաստատել համապարփակ ու ընդլայնված հարաբերություններ: Այս ամենի հետևում հետևյալ գաղափարն է՝ այն կարող է օրինակ ծառայել ուրիշների համար՝ եթե նրանք ցանկանում են», Երևանում պարզաբանել է Հանը: Անդրադառնալով Բրյուսելի հետ ստորագրվելիք համաձայնագրին՝ ՀՀ ԱԳ նախարարը ընդգծել է, որ այն կարող է հանդիսանալ Բելգիայի մայրաքաղաքում նոյեմբերի 24-ին կայանալիք Արևելյան գործընկերության գագաթաժողովի հիմնական ձեռքբերումներից մեկը․ - «Ավարտվել է նաև Հայաստանի և Եվրամիության միջև գործընկերության առաջնահերթությունների փաստաթղթի համաձայնեցումը»: Այսպես, Յոհանես Հանը շեշտում է անգամ, որ ՀՀ-ԵՄ համաձայնագիրը բեկումնային է և ԵՄ շահերից է բխում տեսնել կայուն և բարեկեցիկ Հայաստան և համոզմունք է հայտնում, որ համաձայնագիրը կամրապնդի և կխորացնի Հայաստանի և Եվրամիության միջև գործակցությունը: Սերժ Սարգսյանի հետ հանդիպմանը ՀՀ նախագահն ու ԵՄ հանձնակատարը գոհունակությամբ են արձանագրել, որ Հայաստան-ԵՄ համագործակցությունը արդյունավետորեն և դինամիկ զարգանում է: Նրանք քննարկել են Հայաստան-ԵՄ համագործակցության օրակարգը, նախանշել երկկողմ հարաբերությունների զարգացման ուղղությամբ հետագա քայլերը, անդրադարձել նաև Համապարփակ և ընդլայնված գործընկերության մասին համաձայնագրի ստորագրման նախապատրաստական փուլի աշխատանքներին: Եվրոպացի բարձրաստիճան պաշտոնյան, այսպիսով, արձանագրում է, որ Համապարփակ և ընդլայնված գործընկերության համաձայնագրի ստորագրմամբ դեպի առաջ մեծ քայլ կկատարենք: ԵՄ-ն, փաստացի, բավարարեց Հայաստանի եվրասիական քմահաճությունը: Անգամ եվրոպացիներն են հայտարարում, որ համաձայնագիրը չի խոչընդոտում Հայաստանի՝ ԵԱՏՄ-ին անդամակցությանը: Նոյեմբերի 24-ին ծրագրված Բրյուսելյան գագաթնաժողովից մեկուկես ամիս առաջ՝ ՀՀ և ԵՄ պաշտոնյաների հավաստիացումները հուսադրող են թվում, թեև խորքում, այդ հավաստիացումներում ավելի ու ավելի շատ անհանգստության, մտահոգության նոտաներ են նկատվում: Ինչպես երևում է, պարբերաբար միմյանց վճռականությանը չկասկածելու մեկուկես ամիսն է սա լինելու՝ մինչև բրյուսելյան գագաթնաժողովը... Թամար Բագրատունի