Հայաստանը՝ ռուս-թուրք-ադրբեջանական եռանկյունու արանքում
ՊՆ-ն մտադիր է հաջորդ տարի լրացուցիչ 27 միլիարդ դրամի նոր սպառազինություն ձեռք բերել: Պատասխանելով լրագրողների հարցին՝ նախարար Վիգեն Սարգսյանն ընդգծել է, որ 2018 թվականի բյուջեի նախագծում պաշտպանական ոլորտի ծախսերը հիմնականում հենց այդ նպատակով են ավելացել մոտ 55 միլիոն դոլարով։ Նախարարը, սակայն, չի մանրամասնել, թե որ երկրներից և ինչ նոր զինատեսակներ են ցանկանում ձեռք բերել՝ ասելով․ - «Ես նախընտրում եմ զենքը ցույց տալ զորահանդեսների ժամանակ: Առաջիկա գնման, հնարավոր գնման, այստեղից-այնտեղից ձեռք բերման մասին խոսակցությունն անօգուտ է, անիմաստ է: Առաջին հերթին՝ որովհետև դա դժվարացնում է բոլոր գործընթացները, երկրորդը, որովհետև դա քո հեռանկարային ծրագրի բացահայտումն է, որը նաև հակառակորդին թույլ է տալիս հակամիջոցներ ձեռնարկել»: Հիշեցնենք, որ սպառազինության ձեռք բերման վերջին խոշոր պայմանագիրը Հայաստանը ստորագրեց անցյալ տարվա սկզբին։ 200 միլիոն դոլար վարկի դիմաց ռազմավարական դաշնակից համարվող Ռուսաստանը Հայաստանին պարտավորվեց տրամադրել մի շարք նոր սպառազինություններ։ Սակայն գրեթե երկու տարի է անցել, իսկ այդ մատակարարումը դեռ չի ավարտվել: Պնախարարը, մինչդեռ, երեկ վստահեցրել է, թե մոտ ժամանակներս Ռուսաստանը կտրամադրի ողջ սպառազինությունը․ - «200 միլիոնը նախատեսվում է ավարտին հասցնել մինչև այս տարեվերջ, ինչպես նախատեսված էր պայմանագրերով»: Վիգեն Սարգսյանի հայտարարությունը, թե ՊՆ-ն մտադիր է հաջորդ տարի լրացուցիչ 27 միլիարդ դրամի նոր սպառազինություն ձեռք բերել, հնչում է ուշագրավ պահի: Օրեր առաջ ՌԴ Անվտանգության խորհրդի քարտուղար Նիկոլայ Պատրուշևը մեկնել էր Բաքու: Նա հանդիպել է Ադրբեջանի նախագահի վարչակազմի ղեկավար Ռամիզ Մեհթիևի հետ, քննարկել են կրոնական ծայրահեղականության և ահաբեկչության դեմ պայքարի հարցեր, նաև` միջազգային տեղեկատվական անվտանգության ոլորտում երկկողմ համագործակցությունը: Իսկ Իլհամ Ալիևի հետ հանդիպմանը Նիկոլայ Պատրուշևը ասել է, որ Ռուսաստանն ու Ադրբեջանը կարող են միասին դիմակայել տարածաշրջանում «նոր մարտահրավերներին»: Այս այցն, ի դեպ, տեղի ունեցավ Ռուսաստանի Դաշնության նախագահ Վլադիմիր Պուտինի՝ Անկարա կատարած այցից հետո, ու փաստորեն ՌԴ անվտանգության խորհրդի քարտուղար Պատրուշևը Բաքվում հարկ է համարել Ալիևի հետ քննարկել է անվտանգությանն առնչվող հարցեր: Հետաքրքիր է՝ ի՞նչ է մտմտում Մոսկվան: Ի՞նչն է տարել ՌԴ բարձրաստիճան պաշտոնյային Բաքու: Ի՞նչ նոր դավադրություն են գծում ռուսները՝ Բաքվի ու Անկարայի հետ: Մի կողմից Մոսկվան կարող է Բաքվի առջև արդեն առավել խիստ դնել Ադրբեջանի՝ Եվրասիական միությանն անդամակցելու հարցը: Մյուս հարցն այն է, թե ինչի՞ դիմաց նա կարող է այդ հարցը դնել... Իհարկե՝ Ղարաբաղը... Բայց ի՞նչ կցանկանա նա ստանալ Ղարաբաղում: Իհարկե ղարաբաղյան հակամարտության գոտի ռուսական զորքերի տեղակայում: Մետաքսյա Շալունց