Բրենդային թանկարժեք հագուստներ կրելը չի նշանակում լինել բարձրաճաշակ. ոճաբան
«Հրապարակ» թերթը գրում է. «Բրենդային թանկարժեք հագուստներ կրելը չի նշանակում լինել բարձրաճաշակ: Իրականում պատշաճ հագուստ կրելու, սեփական ոճն ունենալու համար անհրաժեշտ է դիմել մասնագետներին` ոճաբաններին, դիզայներներին, որոնք կոչված են ստեղծելու գրագետ կերպարներ, հատկապես եթե խոսքը գնում է քաղաքական գործիչների, պատգամավորների, առավել եւս` երկրի առաջին դեմքի մասին:
Վերջերս Նիկոլ Փաշինյանը կտրուկ փոփոխություն արեց իր իմիջում` իր հագուկապին ավելացնելով գլխարկ` կեպի: Դրանով նա նախ հայտնվեց Գյումրիում, որտեղ մարդիկ եզրակացրին, որ Գյումրվա կոլորիտին մոտ լինելու փորձ է արել նա: Բոլորը լավ հիշում են Գյումրիի նախկին քաղաքապետ Վարդանիկին` Վարդան Ղուկասյանին, ով առանց կեպիի ոչ մի տեղ չէր գնում:
Գյումրիից հետո Փաշինյանը նույն գլխարկով տարբեր հանդիպումների է մեկնում, աշխատանքային այցելություններ կատարում մարզեր: Համացանցում մարդիկ քննարկում են դա, ոմանք կարծում են, որ կեպին նախընտրելու պատճառն այն է, որ այն համարվում է ադրբեջանական գլխարկ` հատկապես շատ են կրում ռուսական շուկաներում աշխատող ազերիները, դրանց Ռուսաստանում անվանում են aзербайджанская кепка:
Դիզայներ, ոճաբան Արամ Նիկոլյանը, ում մենք հիշում ենք Մարզահամերգայինի բեմում Եվրոպայի առաջնության բացման ժամանակ ադրբեջանական դրոշն այրելու ակցիայից, «Հրապարակի» հետ զրույցում նշեց, որ Փաշինյանի գլխարկից հիմնականում կրում են վրացիները եւ ադրբեջանցիները, սակայն չի կարելի ասել, թե նման գլխարկներն ադրբեջանական են։
«Ասել, որ կա մի կոնկրետ երկիր, որտեղ բոլորը նման կեպկաներ են կրում, որից վարչապետն է կրում, սխալ է, ես կոնկրետ նման երկիր չգիտեմ, սակայն դրանք ավելի տիպիկ են կովկասյան երկրների ժողովուրդներին` Վրաստան, Ադրբեջան: Ես համաձայն չեմ այն մտքի հետ, որ այդ գլխարկներն ունեն ադրբեջանական ծագում: Ադրբեջանն այդքան լուրջ երկիր չէ, որ իր սեփական գլխարկն ունենա: Եթե շատ խորությամբ ուսումնասիրենք, ապա նման գլխարկներն ավելի շատ ամերիկյան ոճով են ու գնում են դեպի Չիկագո: Ադրբեջանն իր ողջ պատմության ընթացքում այդքան չկա, որ հասնի գլխարկներին: Գուցե չեմ բացառում, որ այդ գլխարկներն ասոցացնում են կովկասյան ժողովուրդների հետ», – ասում է Նիկոլյանը:
Իսկ որպես ոճաբան՝ ի՞նչ գնահատական կտա Նիկոլ Փաշինյանի կերպարին, նրա հագուստներին, գլխարկին։
«Կոնկրետ գլխարկների առումով չեմ կարծում, որ եթե նա ղեկավար է, ապա չի կարող գլխարկներ կրել, սակայն եթե կոնկրետ ոճի մասին ենք խոսում, ապա ինձ դուր չի եկել այն, ինչ տեսել եմ կադրում: Ես առհասարակ նրա ոչ մի քայլին չեմ հետեւում, սակայն չեմ էլ կարծում, թե ինչ-որ բան կարող էր դրանից ավել լինել: Իմ կարծիքով, մասնագիտական խորհուրդ չի եղել, իրեն դուր է եկել, գլուխը մրսել է, գլխարկ է դրել, բայց թե ով է խորհուրդ տվել, կամ՝ առհասարակ կա՞ նման մարդ, որ նրան նման խորհուրդներ է տալիս, ես այդպես չեմ կարծում:
Այստեղ հարցը ճիշտ մատուցման մեջ է: Կա հագնվելու էթիկա, որին պետք է քաղաքական գործիչները հետեւեն: Դա հագնվելու պրոտոկոլ է, որին պետք է հետեւեն երկրի ղեկավարներն ու նրանց կանայք: Պրոտոկոլն էլ ունի իր կրիտերիաները, մեկը պահում է, մյուսը չի պահում: Կան մասնագետներ, որոնք զբաղվում են երկրի ղեկավարների իմիջով: Մեր երկրում չգիտեմ` կա՞ն այդպիսիք, թե՞ չկան»,- եզրափակեց ոճաբանը»:
Հետևեք մեզ Viber-ում
