«Խաղը» գնալով հետաքրքրանում է․ Սերժ Սարգսյանին շտապեցնում են
Հայաստանում Եվրամիության պատվիրակության ղեկավար, դեսպան Պյոտր Սվիտալսկին Հայաստանի իշխանություններին հորդորում է չսպասել և հենց այսօրվանից նախապատրաստվել Եվրամիության և Հայաստանի միջև վիզային ռեժիմի ազատականացման գործընթացին։ Արևելյան գործընկերության ծրագրի ապագային նվիրված քննարկման ժամանակ Սվիտալսկին անդրադարձել է Եվրամիություն-Հայաստան համագործակցության հեռանկարներին, ընդգծելով՝ վիզաների ազատականացման գործընթացը մեծ ձեռքբերում է։ «Այսօրվանից սկսեք ձեր ներքին նախապատրաստությունները, որովհետև Վրաստանի, Ուկրաինայի և Մոլդովայի փորձը ցույց է տալիս, որ յուրաքանչյուր երկիր բազմաթիվ օրենսդրական և վարչարարական փոփոխություններ պետք է կատարի՝ անհրաժեշտ պահանջներին համապատասխանելու համար: Այնպես որ՝ ժամանակ մի կորցրեք և կատարեք ձեր տնային աշխատանքը, ու ես հուսով եմ՝ այդ պահը կգա: Իսկ այժմ եկեք աջակցենք վրացիներին և հաջողություն մաղթենք՝ վիզային ռեժիմի ազատականացումը ներդնելու հարցում, քանի որ դա լավ ազդեցություն կունենա Հայաստանի վրա»,- ասել է ԵՄ դեսպանը: Նա հակիրճ անդրադարձել է նաև նոյեմբերին Եվրամիության և Հայաստանի միջև ստորագրվելիք նոր համաձայնագրին, շեշտելով՝ Բրյուսելում դրական են տրամադրված․ «Ես հավատում եմ, որ Բրյուսելի գագաթնաժողովից Հայաստանի համար լավ լուրեր կստացվեն»: Հիշեցնենք, որ նոյեմբերի 24-ին Բրյուսելում տեղի է ունենալու Եվրամիության Արևելյան գործընկերության գագաթնաժողովը, որի ընթացքում էլ նախատեսվում է Եվրամիության և Հայաստանի միջև Համափարպակ և ընդլայնված գործընկերության համաձայնագրի ստորագրումը: Այն փոխարինում է նախկին՝ Ասոցացման համաձայնագրին, որի ստորագրումը, հիշեցնենք, տապալվեց Հայաստանի՝ ՌԴ ստեղծած Մաքսային միությանն անդամակցելու որոշման պատճառով: Դեսպան Սվիտալսկին ընդգծել է՝ Հարևանության ծրագրի հանդեպ Եվրամիության հետաքրքրությունն աստիճանաբար աճում է, և դա նկատելի կլինի նաև գագաթնաժողովի ընթացքում։ Եվրամիության պատվիրակության ղեկավարի խոսքով՝ Բրյուսելը մեծ ուշադրությամբ է հետևում Արևելյան գործընկերության երկրներին, այդ թվում՝ Հայաստանին։ Սվիտալսկին անդրադարձել է նաև, իր բնորոշմամբ, «աշխարհաքաղաքական խաղերին», շեշտելով՝ ԵՄ-ն չի ուզում նման խաղերի մասնակիցը դառնալ: Բայց իրենք նաև չեն ընդունի, որ «այս տարածաշրջանի որևէ մասը դառնա բացառիկ ազդեցության գոտի»։ «Մենք չենք ուզում, որ մեզ դիտարկեն որպես ոչինչ չտվող խաղի մեջ ներգրավված կողմ: Եվրամիությունը չի ուզում այդ խաղը խաղալ: Մենք նաև հստակորեն մերժում ենք Եվրոպան կամ աշխարհի ցանկացած այլ մասը բացառիկ ազդեցության գոտիների բաժանելու գաղափարը», հավելել է Սվիտալսկին: Փաստացի, Եվրամիության պատվիրակության ղեկավարը որոշակի շտապողականություն է ցուցաբերում՝ մի տեսակ առաջ անցնելով, Հայաստանի իշխանություններին հորդորելով չսպասել և հենց այսօրվանից նախապատրաստվել Եվրամիության և Հայաստանի միջև վիզային ռեժիմի ազատականացման գործընթացին։ Սա նշանակում է, որ ԵՄ-ն Հայաստանից կոնկրետ քայլերի է սպասում ՀՀ իշխանությունների կողմից։ Իսկ Հայաստանը, նկատենք, որ վիզային ռեժիմի ազատականացման գործընթացով խիստ հետաքրքրված է։ Հիմա ԵՄ դեսպանը, կարծես, հասկացնել է տալիս, որ արժե չսպասել ԵՄ—Հայաստան համաձայնագրի ստորագրմանն ու արդեն իսկ օրենսդրական փոփոխություններ իրականացնել։ Արդյոք սա նշանակում է, որ ԵՄ-ն համոզված է, որ նոյեմբերին Հայաստանն ու ԵՄ-ն կստորագրեն համաձայնագիրը։ Թերեւս այո, սա այդ համոզվածության մասին է վկայում։ Սակայն ուշագրավ է նաեւ ԵՄ դեսպանի մյուս ակնարկը, որ՝ իրենք չեն ընդունի, որ «այս տարածաշրջանի որևէ մասը դառնա բացառիկ ազդեցության գոտի»։ Սա ուղղակի մեղադրանքի սլաք է, որը, վստահաբար, ուղղված է Ռուսաստանին, որի ազդեցությունն առանց այն էլ մեծ է Հայաստանում։ Այսինքն, ԵՄ-ն հստակ հասկացնել է տալիս, որ Ռուսաստանի ավելի մեծ ազդեցության ամրապնդումն անթույլատրելի է եւ դա, մեղմ ասած, իրենց դուր չի գալիս։ Մինչեւ ՀՀ-ԵՄ համաձայնագրի ստորագրումն, այսպիսով, «կենացները քաղցրանում» են, «խաղը» գնալով հետաքրքիր է դառնում։ Թամար Բագրատունի