Թուրք գլխավոր խմբագիրն ու թղթակիցն ազատ են արձակվել բանտից

Ստամբուլի բանտից ազատ են արձակվել լրտեսության մեղադրանքով ձերբակալված 2 թուրք լրագրողներ՝ երկրի Սահմանադրական դատարանի համապատասխան որոշումից հետո: Այս մասին հայտնում է Agence France-Presse-ը: Cumhuriyet ընդդիմադիր թերթի գլխավոր խմբագիր Ջանա Դյունդարան և Անկարայում պարբերականի բյուրոյի ղեկավար Էրդեմ Գյուլը լրագրողական հետաքննություն են անցկացրել Թուրքիայի հատուկ ծառայությունների կողմից Սիրիայի ջիհադիստներին զենքի գաղտնի մատակարարումների վերաբերյալ: Նրանք ձերբակալվել էին 2015թ. նոյեմբերի 26-ին: Ստամբուլի դատախազությունը Դյունդարայի և Գյուլի համար պահանջել էր ցմահ ազատազրկում: Թուրքիայի Սահմանադրական դատարանը հինգշաբթի վճռել է, որ լրագրողների ձերբակալությունը նրանց իրավունքների խախտում է: Նրանց ձերբակալության պատճառ դարձած դեպքը տեղի է ունեցել Ադանա նահանգում 2014թ. հունվարին, երբ զինծառայողները խուզարկել են Ազգային հետախուզական կազմակերպության բեռնատարները, որոնք ընթացել են դեպի թուրք-սիրիական սահման: Թուրքիայի իշխանությունների վարկածով՝ բեռնատարները «մարդասիրական օգնություն» են տարել սիրիացի թուրքմեններին: Cumhuriyet-ը 2015թ. մայիսին հրապարակել է լուսանկարներ և տեսանյութեր, որոնք արվել են, պարբերականի պնդմամբ, բեռնատարների խուզարկության ժամանակ: Դրանցում երևում են հրետանային ռումբերով, ականներով և այլ ռազմամթերքով լի արկղեր: Թուրքիայի նախագահ Ռեջեփ Թայիփ Էրդողանը հրապարակումից կարճ ժամանակ անց դիմել է դատախազություն՝ պահանջելով քրեական գործ հարուցել թերթի և դրա գլխավոր խմբագրի դեմ: