«Այցն իրականացվել է գիտակցաբար». Արագած Ախոյանն Արցախ այցելած գործիչների մասին

«Վերադարձ» հիմնադրամի նախագահ, ԱԺ նախկին պատգամավոր Արագած Ախոյանի հրավերով սեպտեմբերի 22-24 Արցախ էին այցելել  թուրք քաղաքական գործիչներ, մտավորականներ, լրագրողներ Ուֆուք Ուրասը, Ալի Բայրամօղլուն, Սայիդ Չեթինօղլուն և Էրոլ Քաթըրջօղլուն: Նրա հավաստմամբ՝ Արցախ կատարած այցը պատմական է և այն իրականացվել է գիտակցաբար: «Այցը պատմական էր, այն իրականացվել է գիտակցաբար: Մեր թուրք գործընկերները, որոնք մեր գաղափարակիցներն են, խոսում են Հայոց ցեղասպանության մասին, ճանաչված դեմքեր են Թուրքիայում եւ կարող են իրենց հասարակությանն օբյեկտիվ տեղեկատվություն հաղորդել: Նրանք նաեւ թուրքական քաղաքական վերնախավի ներկայացուցիչներ են եւ որոշակիորեն՝ իշխանական վերնախավի ներկայացուցիչներ, չնայած որոշ հարցերի շուրջ լուրջ տարաձայնությունների: Այդ գործիչները ոչ հակահայ են, ոչ հակաթուրք, ոչ հակաադրբեջանցի: Նրանց նպատակն է՝ հաշտեցման ուղիների որոնում, ազգերի միջեւ թշնամանքի վերացում: Նրանք քաջ գիտակցելով են Արցախ այցելել՝ որպես խաղաղության դեսպաններ»,-ընդգծեց Արագած Ախոյանը: Ախոյանի խոսքով՝ թուրք գործիչներին Արցախ հրավիրելով՝ հիմնադրամը նպատակ է ունեցել  նրանց միջոցով թուրք հասարակությանը օբյեկտիվ տեղեկատվություն տրամադրելու հնարավորություն  ստեղծել. «Այդ գործիչները ոչ հակահայ են, ոչ հակաթուրք, ոչ հակաադրբեջանցի: Նրանց նպատակն է հաշտեցման ուղիների որոնումը, ազգերի միջեւ թշնամանքի վերացումը»: Հարցին, թե նրանց կարտահանձնի՞ Թուրքիան, նախկին պատգամավորն ասաց, որ իր կարծիքով ոչ. «Քաղաքացուն հանձնելը ցանկացած պետության ինքնասիրության խնդիր է: Դատավարություն կլինի գուցե, բայց արտահանձնումը չեմ պատկերացնում»: