Ներքնաշորերով արագաչափերը փակելով իշխանության եկած թիմը վրեժ է լուծում քաղաքացիներից. Սոնա Աղեկյան

Սիրելի քաղաքացիներ, այստեղ քննարկում ենք հարց, որ 2024-ից այլեւս մեքենայով Երեւանի կենտրոն գալը արգելվում է շարքային քաղաքացիների համար, որոնք ի վիճակի չեն լինի տարեկան 160 հազար դրամի չափով դառնալ «տուգանքի մատերիալ»: Այս մասին, այսօր՝ դեկտեմբերի 1-ին, Երեւանի քաղաքապետարանում Երեւանում կայանատեղիների վճարների թանկացման հարցով հանրային լսումների ժամանակ հայտարարեց Երևանի ավագանու «Մայր Հայաստան» խմբակցության անդամ Սոնա Աղեկյանը։ Այս մասին գրում է news.am-ը:

«Այս պոպուլիստական թիմը, որ գալիս էր ներքնաշորերով արագաչափերը փակելով, Զիմզիմովին պրիվիտներ ուղարկելով, խոստանում էր, որ Սաշիկի արագաչափերը վերանալու են, այդ պոպուլիստական խոսքերով շահեց մեր միամիտ, հիասթափված բնակչության մի ստվար զանգվածի վստահությունը եւ ստանձնեց իշխանությունը միանձնյա, եւ անմիջապես սկսեց վրեժ լուծել քաղաքացիներից՝ տարբեր պատժամիջոցներ կիրառելով»,-ասաց նա:

Աղեկյանը վստահություն հայտնեց, որ այս նախագիծը Երեւանի ավագանիում մերժվելու է. «Այս նախագիծը գալիս է բեռնաթափելու ոչ թե Երեւանի կենտրոնը, այլ գալիս է բեռնաթափելու Հայաստանը հայ մարդուց, Երեւանը՝ հայ մարդուց, որոնք ի վիճակի չեն լինելու ապրել այս պայմաններում եւ լքեն Հայաստանը:

Մեզ խոստանում էին, որ Սաշիկի արագաչափերը վերանում են, բայց դրանք դարձան, ըստ մամուլի լուրերի, Մարիամ Փաշինյանի արագաչափեր: Պարոն վարչապետ աշխատող անձը, որ օգտվում է պադավատների շքերթից, իր համար ինչքան է տուգանքի չափը կարմիր գծերի վրա կայանելու դեպքում:

Եվ նաեւ դուք ձեր գործընկեր Արայիկ Հարությունյանին կամ Տիգրան Ավինյանին հարցրե՞լ եք՝ իրենք վերջին անգամ երբ են մետրոյից օգտվել»,-ասաց նա:

Ի պատասխան փոխքաղաքապետ Սուրեն Գրիգորյանն ասաց. «Պետք չի մամուլի անվան տակ ծվարած, ձեր կողմից ֆինանսավորվող եւ ձեր կողմից սնվող աղբյուրներում ինչ-որ բաներ շրջանառել, հետո այդ նույն աղբյուրներին հղում կատարել: Երկրորդը, հաշվի առնելով, թե ինչ քաղաքական ուժի միջոցով եք հայտնվել ավագանիում, եւ ով է այդ ուժը փաստացի ղեկավարում, եւ «թալան» բառն օգտագործելիս որեւէ սահմանափակում չեք զգում: Այսքանն է իմ արձագանքը»:

Նշենք, որ Երևանի քաղաքապետարանը մտադիր է կտրուկ բարձրացնել ավտոմեքենաների կայանման վճարը։ 2024 թվականի հունվարի 1-ից Երեւանի կենտրոնում կարմիր գծերում մեքենա կայանելու գինը տարեկան 12,000 դրամի փոխարեն կդառնա 160,000 դրամ։ Նախագիծը դրվել է հանրային քննարկման։

Ավտոկայանատեղիների վճարների դրույքաչափերը սահմանվելու են գոտիավորման սկզբունքով: Առաջարկվում է Երևան քաղաքում սահմանել Ա և Բ գոտիներ:

Ավտոկայանատեղերի թանկացման նախագիծը հանրության շրջանում բուռն քննադատության առիթ է դարձել։