ԿԳ նախարար. «Ռուսերենին էլ հնարավորություն տանք զարգանալու, որ դառնա մեր երկրի համար կարեւոր լեզու». aravot.am
ՀՀ Հանրային խորհրդի անդամների հետ քննարկման ժամանակ այսօր կրթության և գիտության նախարար Լևոն Մկրտչյանն անդրադարձավ նախարարության մշակած՝ ռուսաց լեզվի զարգացման հայեցակարգին, որը հասարակության և փորձագետների շրջանում քննադատությունների է արժանացել:Այս մասին հայտնում է aravot.am-ը: Լևոն Մկրտչյանը պարզաբանեց՝ ուսումնասիրությունները ցույց են տվել, որ բնական գիտությունների զարգացման համար անհրաժեշտ է օտար լեզուների ուսուցմանն ուշադրություն դարձնել ու նոր մեթոդաբանություն կիրառել հանրակրթական համակարգում, քանի որ ներկայիս մեթոդաբանությունը բավարար չէ: Լևոն Մկրտչյանը նշեց, որ եվրոպական երկրներում, օրինակ, օտար լեզուներ ուսումնասիրում են առաջին դասարանից, իսկ ՀՀ-ում առաջին դասարանում ուսուցանվում է միայն մայրենին: Երկրորդ դասարանից էլ սկսվում է ռուսերենի ուսումնասիրությունը. «Մասնագետները գտան, որ երկրորդ դասարանից ևս կարող է օտար լեզու ուսումնասիրվել, բայց ոչ թե տառերի ուսումնասիրման տեսքով, այլ ասենք՝ խաղերի: Այսպես առաջացավ օտար լեզուների զարգացման հայեցակարգի անհրաժեշտությունը»: Լևոն Մկրտչյանը նկատեց՝ նշյալ խնդրով մշակվեցին անգլերենի, ֆրանսերենի, գերմաներենի հայեցակարգերը, բայց հենց հերթը հասավ ռուսերենին, մամուլը քաղաքականացրեց հարցը. «Քաղաքականացնելու խնդիր իսկապես չկա: Արհեստական ձևով քաղաքականացվեց նորմալ գործընթացը: Օրենքով ՀՀ միակ պետական լեզուն հայերենն է, իսկ այլ լեզուների համար որևէ այլ հասկացություն կամ կարգավիճակ լինել չի կարող»: Մանրամասները՝ սկզբնաղբյուր կայքում