Հետամնացությունը որեւէ ազգի համար նորմալ ավանդույթ չէ. Բորիս Մուրազի

«Մենք հակված ենք դեպի կրթություն։ Մեր կրոնական տեքստերը, որոնք չափածո են, ասում են, որ մենք պետք է կրթվենք։  Ասել, թե մեր ավանդույթները գովելի են կրթության առումով, անազնիվ կլինի։   Երեխաները շատ հաճախ կանոնավոր չեն հաճախում։ Կրթություն ստացող հատկապես եզդի աղջիկների թիվը ավելացել է, նույնիսկ բուհերում է նրանց թիվն ավելի մեծ։ Չկրթվելը միայն մեզ վնասում է։ 40 հազար եզդի կա ՀՀ-ում, սակայն բարձրագույն կրթության առումով ամենավերջին տեղում ենք։ Մեղավորը մեր համայնքն է, մեր մտավորականությունը»,-Հայելի ակումբում լրագրողներին ասաց Եզդիական համայնքի ներկայացուցիչ Հասան Թամոյանը: «Սինջար եզդիների ազգային միավորման» ղեկավար Բորիս Մուրազիի տվյալներով` գյուղական համայնքներում եզդի աղջիկների գերակշիռ մասը 9-րդ դասարանից հետո չի հաճախում դպրոց. «Պետության դերը այս հարցում եւս պետք է խիստ լինի` սահմանելով որոշակի պատժամիջոցներ։ Կամ ընդհակառը` աջակցություն ցուցաբերվի նրանց, որոնք սոցիալական խնդիրներ ունեն, այլ ոչ թե տուգանքներ կիրառեն։ Ուզում եմ ասել, որ հետամնացությունը որեւէ ազգի համար նորմալ ավանդույթ չէ։ Նույնը վաղ ամուսնությունների պահով. 17 տարեկանից ցածր լինելու դեպքում դատարանի որոշում է պետք, սակայն շատ հաճախ ամուսնությունները լինում են, ու պետությունը որեւէ բան չի ձեռնարկում։ Այս օրենքը երիտասարդների կողմից մեծ աջակցություն ունի, ու մենք կողմ ենք օրենքի պարտադիր լինելուն»,-ասաց նա: