Բա, որ կատուն գա մեզ վրա՞
Արտաքին հարաբերությունների մշտական հանձնաժողովը բուռն քննարկումներից հետո մերժեց Ելք խմբակցության առաջարկը՝ ԵԱՏՄ-ից դուրս գալու հարցով ԱԺ ժամանակավոր հանձնաժողով ստեղծելու մասով: Դրան կողմ քվեարկեց հանձնաժողովների անդամներից միայն Արտակ Զեյնալյանը: Ելքի մյուս նախագիծը՝ Հայաստանի Հանրապետության մասով Եվրասիական Տնտեսական Միության պայմանագրի գործողությունը դադարեցնելու գործընթաց սկսելու վերաբերյալ, չքննարկվեց, քանի որ հիմնական զեկուցող Էդմոն Մարուքյանը բացակայում էր: Հանձնաժողովի նախագահ Արմեն Աշոտյանն ասաց, որ նախագծի քննարկումը հետաձգվում է երկու ամսով: ԵՏՄ-ից դուրս գալու հարցով ժամանակավոր հանձնաժողով ստեղծելու նախագծի հիմնական զեկուցողը Նիկոլ Փաշինյանն էր, որը վստահաբար կարող ենք պնդել, որ լուրջ ընդդիմախոս չուներ, բացառությամբ Արտաշես Գեղամյանի մեկ-երկու պոռթկումների։ Երբ Փաշինյանը հիշեցրեց, որ Գեղամյանը ԵՏՄ-ին անդամակցելու ջատագովներից էր, գիրք էր գրել և փորձում էր համոզել, որ ԵՏՄ-ին չանդամակցելու դեպքում պատերազմն անխուսափելի է, Գեղամյանը անցավ հակագրոհի։ «Մենք համ ԵՏՄ մտանք, համ պատերազմ ունեցանք, համ ռազմական կորուստներ: Եվ ընդ որում, հիմքեր կան կասկածելու, որ այդ պատերազմն Ադրբեջանը համաձայնեցրել է մեր ռազմավարական գործընկերների հետ, ԵՏՄ մեր պարտնյորների հետ, որովհտետև ես թշնամական ակտ եմ համարում այն, որ Ղազախստանն ասում է՝ քանի որ պատերազմ է, եկեք ԵՏՄ վարչապետների հավաքը Երևանում չանենք, որովհետև դա կարող է մեկնաբանվել որպես աջակցություն կողմերից մեկին: Դու էդ կողմերից մեկն ես, որովհետև ՀԱՊԿ շրջանակներում պարտավորություններ ունես, էդ քո դեմ են կռիվ անում, քո գյուղերի վրա են կրակում: Ես նկատի ունեմ ՀՀ սահմանի լարված իրավիճակը: Նույնը վերաբերում է նաև Բելառուսին, որն Ադրբեջանին պաշտպանող հայտարարություններ արեց: Նույնը վերաբերում է Ռուսաստանին»,- Փաշինյանի այս հիմնավորումներից հետո Գեղամյանը ի ցույց դրեց ողջ արսենալը։ Նախ փորձեց փաստարկներ ներկայացնել, հիշեցրեց, որ 2014 թվականին եղան ուկրաինական դեպքերը, հետո մոլդովական: «Հիմա հարց, արդյոք հարգարժան զեկուցողը տեղյակ չէ, որ խայտառակ վիճակում է գտնվում Ուկրաինայի էկոնոմիկան, շատ ծանր վիճակում է գտնվում Մոլդովայինը: Դա խոսում է, որ ընտրված կուրսը, այն է՝ անդամակցությունը ԵՏՄ-ին ճիշտ էր: Հակառակ դեպքում կունենայինք այն, ինչ ունենք Ուկրաինայում»,- ասաց Գեղամյանը: Ընդհանրապես ոչ ՀՀԿ-ականները եւ ոչ էլ Ծառուկյան դաշինքի ներկայացուցիչները, որոնք միանալով ՀՀԿ-ականներին դեմ քվեարկեցին ժամանակավոր հանձնաժողով ստեղծելու նախագծին, հիմնավոր փաստարկներ չներկայացրեցին, թե ինչու են դեմ նախաձեռնությանը։ Միքայել Մելքումյանը իր ելույթում ակնարկեց, որ Ռուսաստանից հնարավոր չէ հեռանալ, եթե հեռանանք, ապա ավելի մեծ հարված կհասցնեն։ ՀՅԴ-ական Ռուստամյանն էլ ասաց, որ ոչ ժամանակի, ոչ անվտանգության խնդիրները լուծելու առումով այս նախաձեռնությունը ճիշտ չէ: «Ոչ ժամանակն է ճիշտ ընտրված, ոչ էլ ձևը: Ժամանակը վատ է ընտրված նաև այն առումով, որ մենք այսօր կանգնած ենք ԵՄ հետ պայմանագիր ստորագրելու շեմին: Մենք ամեն ինչ արել ենք, որ կամ-կամ-ի իրավիճակից երկիրը դուրս գա: Այսօր, երբ Եվրամիությունը գնում է մեզ հետ հարաբերվելու՝ նկատի ունենալով ԵՏՄ-ում մեր լինելու փաստը, դա խոսում է այն մասին, որ այդ կամ-կամ-ի տրամաբանությունն այլևս չկա: Մենք ինքներս ինչո՞ւ ենք հրահրում այդ տրամաբանությունը», նշեց նա: «Ռուսաստանը բավականին տարօրինակ պետություն է, ժամանակ առ ժամանակ «կոլցո» օպերացիա է անցկացնում, տարբեր ժամանակ տարբեր կողմերի է աջակցում, և դա բնական է, քանի որ Ռուսաստանի Դաշնությունն առաջնորդվում է Ռուսաստանի Դաշնության շահերով: Սա սովորական քաղաքական իրավիճակ չէ և պետք է շատ զգույշ մոտենալ այս հարցին», ելույթ ունեցավ Արարատ Զուրաբյանը։ «Պարոն Աշոտյան, ձեզ է պետք այդ ժամանակավոր հանձնաժողովը» փորձեց համոզել Նիկոլ Փաշինյանը հիմնավորելով․«Որովհետև դուք ասում եք՝ ԵՏՄ-ն լավ բան է, այ մենք այդ հնարավորությունը կօգտագործենք, հեսա մենք ցույց կտանք, թե ԵՏՄ-ն ինչ լավ բան ա: Էսօրվա նիստի ընթացքում որևէ մեկն այդպիսի բան լսե՞լ է: Էդ ո՞վ հիմնավորեց, որ ԵՏՄ-ն լավ բան ա: Միակ տրամաբանական հիմնավորումը Արտաշես Գեղամյանը բերեց՝ դա շանտաժն է, որ՝ այ, գազը կթանկացնենք, թուրքերին բաց կթողնենք ձեր վրա, սովից կմեռնեք, հոսանքը կթանկանա: Պարոն Աշոտյանը գույնը գցել էր արդեն վախից», - կատակեց Նիկոլ Փաշինյանը նկատելով՝ եթե շանտաժն է գործում, դա պետք է արձանագրել: Անի Սահակյան
Հետևեք մեզ Viber-ում
