Թոշակներն ու աշխատավարձերը չեն բարձրանա, պետական պարտքը կավելանա

Կառավարությունն այսօր հաստատեց Հայաստանի Հանրապետության 2018 թվականի պետական բյուջեի նախագիծը: Ֆինանսների նախարար Վարդան Արամյանը ներկայացնելով բյուջեի ցուցանիշները` նշեց. «Մեր կանխատեսումներում բարձրացրել ենք տնտեսական աճի ցուցանիշը, որը գործող բյուջեում 3.2% էր ամրագրվել, բայց այժմ 5.2% է, և բոլոր ճյուղային զարգացումները ցույց են տալիս, որ 2018թ.-ին տնտեսական աճը կլինի 4.5%»,- հայտարարեց Վարդան Արամյանը։ «Պետք է հաշվի առնել այն, որ 2017 թվականի տնտեսական աճի ծրագրային ցուցանիշը բարձրանում է: Այսինքն, 3.2 տոկոսի փոխարեն մենք ունենալու ենք 4.3 տոկոս, եւ այդ բազայի վրա է հաջորդ տարի ծրագրավորվում 4.5 տոկոս տնտեսական աճ: Բնականաբար միջնաժամկետ հեռանկարում մեր հավակնությունները 4 տոկոսանոց տնտեսական աճը չէ, այլ դրա շրջանակներն են: Դա միջինում 5 տոկոսանոց տնտեսական աճն է: Իսկ որպեսզի մենք կարողանանք դա իրագործել, պետք է քայլեր իրականացնենք»,- ասաց Վարդան Արամյանը: 150 միլիարդ դրամ դեֆիցիտը ֆինանսավորելու համար, Վարդան Արամյանի խոսքերով, Հայաստանը նորից պետական պարտք է վերցնելու: «Դա անխուսափելի է, քանի որ այդպիսի երկիր չկա, որ դեֆիցիտ ունենա ու չմտնի պարտքի շուկա եւ արտաքին կամ ներքին պարտք չվերցնի: Արտաքին պարտքի մասով պետք է նշեմ, որ հիմնականում դրանք ինվեստիցիոն ծրագրեր են, որոնք մենք վերցրել ենք միջազգային ֆինանսական կառույցներից՝ արտոնյալ պայմաններով: Պարտքի մասին խոսելիս մենք պետք է նաեւ հաշվի առնենք այն, որ մեր պարտքի կառուցվածքը բավականին լավ է, դրան գումարած՝ հարկաբյուջետային քաղաքականությունը, որը մենք նախագծել եւ իրականացնում ենք 2017 թվականին եւ 2018 թվականին էլ պատրաստվում ենք իրականացնել, դա միջազգային կառույցները բավականին դրական են գնահատում»,- ասաց Արամյանը: Այսինքն, այս տարեվերջին մեր պետական պարտքը կկազմի մոտ 6.7 միլիարդ դոլար, իսկ հաջորդ տարի կարող է նաեւ հատել 7 միլիարդ դոլարի սահմանագիծը, ինչը նախատեսվում է, որ կկազմի հաջորդ տարվա ՀՆԱ-ի շուրջ 60 տոկոսը: «Մենք մեր հարաբերական ցուցանիշները հաշվելով ներկայացնում ենք, որ Հայաստանը դեռեւս մնում է ցածր պարտքի բեռ ունեցող երկրների շարքում»,- շեշտեց ֆինանսների նախարարը: Թե ինչպես տնտեսական աճը կազդի քաղաքացիների կյանքի որակի բարելավման վրա, Արամյանը նշեց, որ մադկանց կենսամակարդակն աճում է սպառման միջոցով, իսկ այս տարվա առաջին կիսամյակի տվյալներով, սպառումն ավելացել է: Լրագրողների հարցին, թե սոցիալական ծախսերի ավելացում՝ թոշակների, աշխատավարձերի բարձրացում, սպասվո՞ւմ է, Վարդան Արամյանը պատասխանեց՝ առայժմ ոչ: Խոսելով արդյունաբերության և գյուղատնտեսության մասին` նախարարը նշեց, որ ակնկալում են 6% և 4% աճ համապատասխանաբար։ Ընթացիկ ծախսերի աճը կկազմի 2-2.5%։ Եկամուտները կավելանան 100 մլրդ դրամով և կկազմեն 1 տրլն 307 մլրդ դրամ, ծախսերի գծով` 1,499.5 մլրդ դրամ, դեֆիցիտը կկազմի 156.9 մլրդ դրամ: Նախարարը վստահեցրեց նաև, որ բյուջեն սեկվեստորի չի ենթարկվելու։