Խաղաղությունը բացառված է

«Հայատյացությունն Ադրբեջանում պետական կրոն է», «Ազատության» հետ նշել է խորհրդարանի արտաքին հարաբերությունների հանձնաժողովի նախագահ, իշխող ՀՀԿ խմբակցության պատգամավոր Արմեն Աշոտյանը, որը օրերս Բաքվում մասնակցել է Եվրանեսթ ԽՎ-ի սոցիալական, կրթության, մշակույթի և քաղաքացիական հասարակության հարցերի հանձնաժողովի կազմակերպած համաժողովին: Աշոտյանի ընդգծմամբ՝ իրենց «փոքր, բայց հպարտ» պատվիրակության այցն Ադրբեջան ցույց տվեց, որ այդ երկիրը պատրաստ չէ ո՛չ երկխոսության, ո՛չ էլ, առավել ևս, խաղաղության: «Համարենք, որ հայատյացությունը Ադրբեջանում պետական կրոն է, և այդ կրոնը երկրպագողների թիվը, ցավոք սրտի, շատ է: Սա ասում եմ, ելնելով այն հանգամանքից, որ մենք պետք է իրոք հասկանանք, որ մեր հարևան հանրապետության ժողովուրդը տարիներ շարունակ ենթարկվել է հակահայկական քարոզչական ներգործության, թունավորվել է հակահայկական լոզունգներով, և այս ամենը, ցավոք, տեսանելի ապագայում որևէ տեսակի երկխոսության արդյունավետության հույս չի ներշնչում»,- ասաց Արմեն Աշոտյանը: ԱԺ արտաքին հարաբերությունների հանձնաժողովի նախագահի խոսքով, դա անշուշտ չի նշանակում, թե չպետք է երկխոսել, ընդհակառակը՝ ցանկացած հարթակ պետք է օգտագործել՝ ադրբեջանական հասարակության հետ շփվելու համար, քանի որ տարիներ շարունակ իրականացվող հակահայկական քարոզչության արդյունքում այնտեղ «հայերից կերտել են արնախում ժողովդի» կերպար: Միևնույն ժամանակ, Արմեն Աշոտյանը շեշտում է՝ նաև չպետք է սին խաղաղասիրությամբ կերակրենք մեր ժողովրդին: «Մենք չպետք է մեր սին պացիֆիզմով, խաղաղասիրությամբ կերակրենք ժողովրդին և կորցնենք մեր զգոնությունը: Խաղաղության հասնելու համար միշտ պետք է պատրաստ լինել պատերազմի: Սա, երևի թե, ամենապարզ ու ամենաիրական հետևությունն է, որ պետք է անել մեր այցից»,- շարունակեց ԱԺ արտաքին հարաբերությունների հանձնաժողովի նախագահը: Հայ պատգամավորների Բաքու կատարած երկօրյա այցի ընթացքում նրանց մշտապես ուղեկցել են այդ երկրի անվտանգության ծառայության աշխատակիցները: Միակ միջադեպը, ընդդիմադիր պատգամավոր Մանե Թանդիլյանի փոխանցմամբ, տեղի ունեցել ազգությամբ հայ, լրագրող ներկայացող Սյուզան Ջաղիյանի հրահրմամբ․ վերջինս մոտեցել է իրենց և սկսել է հայերեն լեզվով հայհոյել: Եվրանեսթի ԽՎ Բաքվում կայացած համաժողովին հայ խորհրդարանականներից մասնակցել է նաև ընդդիմադիր «Ելք» դաշինքի պատգամավոր Մանե Թանդիլյանը: Երկօրյա այցից նույն տպավորությունն է ստացել՝ Ադրբեջանը պատրաստ չէ խաղաղության, անգամ՝ որևէ թեմայով երկխոսության: Թանդիլյանը շեշտում է՝ ցանկացած հարց, անգամ կանանց իրավունքներին վերաբերող թեմաներն ադրբեջանական կողմը մտածված վերածում է հակահայկական քարոզչության։«Ըստ էության, նրանք անգամ այդպիսի չեզոք միջոցառումը պատրաստ են վերածել հակահայկական քարոզի: Շատ սլացիկ անցում էր կատարվում պատերազմական իրավիճակում գտնվող կանաց հարցերին, կանանց նկատմամբ բռնությանը, որ նաև հայերն են դա արել և այլն, և այլն: Այսինքն՝ ամեն թեմայի մեջ, ամեն խոսքից հետո նրանք պատրաստ են դա վերածել հակահայկական ագիտացիայի: Դա նշանակում է, որ նրանք հատկապես Արցախի թեմայի շուրջ երկխոսելու պատրաստ չեն»,- «Ազատությանն» ասել է Մանե Թանդիլյանը: Պատգամավորը հատկանշական է համարում, որ իրենց երկօրյա այցի ընթացքում որևէ ադրբեջանցի պաշտոնյա կամ պատգամավոր հայկական պատվիրակության հետ շփվելու որևէ փորձ չարեց: «Ելք»-ի պատգամավորի դիտարկմամբ՝ այնտեղ ամեն ինչ վերահսկվում է, և որևէ մեկն ինքնուրույն կարծիք արտահայտելու իրավունք չունի․ «Մեզ հետ շփվում էին միայն այն մարդիկ, ում որ կարելի էր»: Ի դեպ՝ Բաքվում հայաստանցի պատգամավորները Ազգային ժողովի արտաքին հարաբերությունների հանձնաժողովի ֆեյսբուքյան էջում ոգելից խմիչքով լի բաժակներով լուսանկար էին հրապարակել՝ որում նշում են Հայաստանի անկախության 26-րդ տարեդարձը: Այդ լուսանկարը Բաքվում միանշանակ չէր ընդունվել: Միլի Մեջլիսի պատգամավորներից մեկը, ըստ «Haqqin.az»-ի, հայտարարել էր, թե հայ պատգամավորներն այդ լուսանկարով սադրում են ադրբեջանցիներին, նրանց դրդելով բռնությունների: Թեև Ադրբեջանում տիրող իրավիճակի մասին որոշակի պատկերացումներ մեզանում գոյություն ունեին, բայց, այնուամենայնիվ, Բաքու` հայ պատգամավորների այցը, տեղում մթնոլորտին ավելի մոտիկից ծանոթանալու հրաշալի առիթ էր: Իսկ այն, ինչ տեսել են հայ պատգամավորները ուղիղ արտացոլում է այն իրավիճակը, որում գտնվում է այդ երկրում թե՛ իշխանական կառույցները, և թե՛ վստահաբար հասարակությունը: Պետք է ճշգրտորեն գնահատել այն մթնոլորտը, որն առկա է Ադրբեջանում: Արձանագրենք, որ դա մի երկիր է, որտեղ 2 տասնամյակից ավելի հայատյացությունն օր-օրի ուժգնացել է: Սա, օրինակ, անգամ առաջիկա 10-20 տարում խաղաղության մոտենալու հնարավորությունն է բացառում, եթե ոչ` 50 տարում: Պետք է ուղղակի ռեալ խոստովանել, որ Ալիև կրտսերի օրոք անհնար է խաղաղությունը, որովհետև ինքն Ալիևն է անգամ իր իսկ լարած ծուղակում հայտնվել, եթե անգամ ցանկանալ էլ խաղաղություն կնքել` արդեն չի կարող իր իսկ ստեղծած մթնոլորտի պատճառով: Անկեղծորեն նաև խոստովանենք, որ Ալիևի քաղաքականության արդյունքում` հայկական կողմն է շահել, որովհետև Ալիևից ոչ ոք ավելի լավ չապացուցեց, որ ղարաբաղցին չի կարող ապրել հայատյացության պայմաններում, քանի որ երկու տասնամյակ սերունդներն այդ երկրում մեծանում են հայի արյուն խմելու, վրեժ լուծելու երազանքով: Միայն պետք է հուսալ, որ ալիևյան Ադրբեջանի առկայությունից հնարավորինս շահած պետք է դուրս գալ և աշխատել այդ ուղղությամբ ամենայն լրջությամբ: Թամար Բագրատունի