Պետք է կազմակերպենք ժողովրդին

Ինչպես հայտնի է՝ անազատության մեջ գտնվող Ժիրայր Սէֆիլյանն «Արմավիր» ՔԿՀ-ից հասցեական դիմում է հղել Հայաստանի ընդդիմադիր հասարակական և քաղաքական գործիչներին՝ կոչ անելով «վերջ տալ ինքնախաբեությանը և ընդդիմադիր դաշտում ձևավորվող նոր օրակարգով ստեղծել Ազգային դիմադրության ճակատ» և իշխանափոխություն իրականացնել: «Ժամանակն է, որ դուք ազգին ու Հայրենիքին վերադարձնեք այն ամենը, որ ստացել եք՝ որպես շնորհներ, հարգանք, հեղինակություն և կարգավիճակ։ Սարդարապատային ներկայիս իրավիճակում ձեր պարտքն է՝ զանգեր հնչեցնել և ժողովրդին առաջնորդել ապստամբության։ Թամար Հովհաննիսյանին և Պետրոս Մակեյանին խնդրում եմ ստանձնել կից ցուցակում նշված գործիչներին համախմբելու և Ճակատի ձևավորման համար անհրաժեշտ նախնական կազմակերպչական աշխատանքի պատասխանատվությունը։ Ստորև հրապարակում եմ (այբբենական կարգով) սույն դիմումի հասցեատերերի ցուցակը, որը, անշուշտ, սպառիչ չէ և պետք է համալրվի ինքնառաջադրման կամ երաշխավորության կարգով. Առաքելյան Արմինե, Անդրեասյան Կարեն, Ավետիսյան Վոլոդյա, Բադասյան Վահան, Բաղդասարյան Ալբերտ, Բարսեղյան Լևոն, Գրիգորյան Արմեն, Դիլբարյան Նարինե, Ենիգոմշյան Ալեք, Զոհրաբյան Ապրես, Իոաննիսյան Դանիել, Խառատյան Հրանուշ, Կարապետյան Ռուբեն Կյուրեղյան Արմենակ, Հովհաննիսյան Արմեն, Հովհաննիսյան Թամար, Հովհաննիսյան Հմայակ, Հովհաննիսյան Րաֆֆի, Մակեյան Պետրոս, Մարտիրոսյան Արմեն, Մարտիրոսյան Վահրամ, Միքայելյան Սասուն, Պապյան Արա, Պետրոսյան Եղիշե, Ռուբինյան Կարապետ, Սանասարյան Դավիթ, Սաֆարյան Ստեփան, Փաշինյան Նիկոլ, Փոստանջյան Զարուհի, Օհանյան Սեյրան, Օսկանյան Վարդան»,- գրել է Ժիրայր Սէֆիլյանը։ «Ժողովրդավարական Հայրենիք» կուսակցության նախագահ Պետրոս Մակեյանը մեզ հետ զրույցում ողջունեց Սէֆիլյանի կոչը և ասաց. «Այո, ողջունում եմ եւ կարծում, որ անգամ այն ուշացած է։ Պետք էր ժամանակին անել։ Այդուհանդերձ, ես ինձանից կախված ամեն ինչ անելու եմ նպատակին հասնելու համար»: Հարցին՝ դեռեւս կսպասե՞ն՝ հասկանալու, թե կոչի հասցեատերերը ինչպես կարձագանքեն, հետո կանցնեն գործողությունների, նշեց. «Բնականաբար, դժվար է լինելու իրագործել այդ ամենը՝ հաշվի առնելով վարչակարգի պարբերական հուժկու հարվածները։ Վերջինը ապրիլյան ընտրություններն էին, որոնք վերածվեցին 10-ը հազար դրամների պայքարի, երկրում խորացրեցին հուսահատությունը, անարդարության մթնոլորտը, դրան գումարած մարդկանց հիասթափությունն ու սոցիալական ծանր կացությունը: Կարող ենք ասել, որ մեծ գործիք է վարչախմբի ձեռքում։ Ավելին, կարող ենք ասել, որ իշխանության գոյության ու շարունակելիության, հղփանալու, թալանն իրագործելու համար իրենք ամեն ինր անելու են ժողովրդին որպես գործոն արանքից հանելու համար, հուսահատության մեջ գցելու, արտագաղթելու եւ այլնի մեջ։ Այս ամենը հասկանալով՝ մենք պետք է ժողովրդին ինքնակազմակերպենք եւ հակառակ գործողությունների հասնենք»։ Մակեյանը մեզ հետ զրույցում ասաց, որ համաձայն չէ, թե պահը նպաստավոր չէ ազգային դիմադրության ճակատ ստեղծելու համար եւ որ ժողովրդական ընդվզման համար նախընտրական եւ հետընտրական ժամանակահատվածն է պատեհ: Նրա խոսքով կա մի քանի ազդակ, որոնց միջոցով կարելի է ձեւավորել այդ ճակատը, օրինակ Սերժ Սարգսյանի վարչապետ դառնալու եւ Ղարաբաղի հարցը․«Կարծես Ղարաբաղի հարցում պարտադրանք կա»։ Մեր դիտարկմանը, թե հայտնի է՝ ինչպես ավարտվեց Սասնա ծռերի ապստամբությունը, Մակեյանն արձագանքեց, որ ժողովուրդը սկզբում ինքնակազմակերպված չէր, իսկ երբ արդեն միացավ ապստամբությանը, վարչակարգը Սարի թաղի «պատերազմը» սարքեց․«Մեր խնդիրը հիմա պետք է լինի անցյալի փորձից ճիշտ հետեւություն անել եւ ճիշտ ինքնակազմակերպել»։ Անի Սահակյան