Արագածոտնի ՀՅԴ-ական մարզպետի կալվածքները, տները եւ թաքցրած բաժնետոմսը.ՀԺ

Արագածոտնի ՀՅԴ-ական մարզպետ Աշոտ Սիմոնյանը բավականին մեծ կարողության տեր է: Սիմոնյանը ունի մեկ բնակարան բազմահարկ բնակելի շենքում, մեկ առանձնատուն`հողամասի վրա կառուցված, իր հարակից շինություններով: Արագածոտնի մարզպետն ունի նաեւ հինգ հողամաս, որոնք գտնվում են տարբեր հասցեներում: Այս մասին տեղեկանում ենք մարզպետի ներկայացրած հայտարարագրից:Հայկական ժամանակին   հաջողվեց պարզել, որ Սիմոնյանի բնակարանը գտնվում է Երեւանի 16-րդ թաղամասում, իսկ առանձնատունը` Արագածոտնի մարզի Կաթնաղբյուր գյուղում: Այս գյուղում են գտնվում նաեւ վերջինիս հողամասերը:Աշոտ Սիմոնյանը, ըստ հայտարարագրի, ունի 6 մլն 500 հազար ՀՀ դրամ, 12 հազար ԱՄՆ դոլար եւ 8 հազար եվրո: Մինչ այս մարզպետի եկամուտը կազմել է 1 մլն 600 հազար դրամ, որը գոյացել է նրա աշխատավարձից:Նշենք, որ Սիմոնյանը մասնագիտությամբ տնտեսագետ է: Նա նաեւ իր ընկերությունն ունի: Խորհրդարանական ընտրությունների ժամանակ նա ԿԸՀ էր ներկայացրել իր ունեցվածքի մասին տեղեկություններ եւ նշել, որ «Ամինտաս Գրուպ» ընկերության տնօրենն է: Մամուլի հրապարակումների համաձայն, նա նշել էր, որ այս ընկերությունից ունի 7 մլն 310 հազար դրամի շահաբաժին: Սակայն այս մի հայտարարագրում Սիմոնյանը մոռացել է այդ բաժնեմասից տվյալներ հայտարարագրել:Եթե նա վաճառած լիներ իր բաժնետոմսերը, ապա պետք է ստացված գումարը, որպես եկամուտ, նշեր իր հայտարարագրում, բայց Սիմոնյանի եկամուտներն, ըստ հայտարարագրի, ձեւավորվել է միայն աշխատավարձից: