Իրանն առաջիկա օրերին լայնածավալ զորավարժություններ կանցկացնի

Իրանի զինված ուժերն առաջիկա օրերին կանցկացնեն «Էքթեդար 1402» («Իշխանություն 2023») լայնածավալ զորավարժությունները, հաղորդում է Tasnim պետական գործակալությունը։

«Առաջիկա օրերին ցամաքային զորքերի տարբեր ստորաբաժանումների մասնակցությամբ կանցկացվեն «Էքթեդար 1402» ցամաքային զորավարժությունները»,- ասվում է նյութում։

Զորավարժություններին կներգրավվեն զրահապատ տանկեր, հրետանի, հրթիռային, դեսանտային, անօդաչու և այլ ստորաբաժանումներ՝ բոլոր տեսակի տեխնիկայի ներգրավմամբ։

Զորավարժությունները կանցկացվեն Նասրաբադ շրջանում՝ Սպահան քաղաքի մոտ, որը գտնվում է Իրանի կենտրոնում։

Զորավարժություններն անցկացվում են Գազայի հատվածից Իսրայելի և պաղեստինյան ՀԱՄԱՍ շարժման միջև հակամարտության սրման ֆոնին։ Միաժամանակ, Թել Ավիվը մտավախություն ունի, որ Թեհրանը կամ տարածաշրջանում նրա դաշնակիցները կարող են միջամտել մարտերին։ Իսրայելի իշխանությունները զգուշացնում են Իսլամական Հանրապետությանը նման քայլից։