Azerichild.info-ն աշխարհին կպատմի Ադրբեջանում մանկապարտեզային տարիքից հայատյացության սերմանման մասին
Ադրբեջանում հակահայկական քարոզչությունը բնակիչների շրջանում սերմանվում է արդեն վաղ մանկական տարիքից՝ դրանով իսկ մեծացնելով հայերին ատող մի սերունդ:
Artsakhpress.am
Հայ փորձագետները վերջին տարիներին ամենայն ուշադրությամբ հետևում ու արձանագրում են այդ երևույթը և դրա վերաբերյալ տեղեկատվությունը հասանելի դարձնում ինչպես հայ, այնպես էլ հենց ադրբեջանցի ու նաև միջազգային լսարանին: Այդպիսի հաջողված տեղեկատվական հարթակ է «Azerichild.info» նախագիծը, որի շնորհանդեսը կայացավ փետրվարի 25-ին Երևանում:
«Azerichild.info» նախագծում հավաքված է Ադրբեջանում հայատյացություն քարոզող մանկական ուսումնական և մեթոդական գրականության հարուստ բազա: Բազմաթիվ օրինակներով ցույց է տրված, թե ինչպես է հայատյացությունն այդ երկրում քաղաքացիների մեջ սերմանվում մանկապարտեզային տարիքից սկսած: «Ադրբեջանում մայրերն իրենց 5 տարեկան երեխաների հետ խոսում են «չար ու մարդասպան» հայերի մասին, այդ տարիքից սկսած՝ երեխայի ուղեղը լվանալով»,- ասաց Արմինե Ադիբեկյանը: Ըստ նախաձեռնության հեղինակների՝ Ադրբեջանում մեծացել է մի սերունդ, որի հետ իրենց տարեկից հայերի սերունդը ապագայում կարող է առնչվել և անմիջականորեն զգալ հայատյացության հետևանքները: Հոգեբան Իզաբելլա Ղազարյանի դիտարկմամբ՝ հայատյացությունն Ադրբեջանում ընթանում է երկու մակարդակով՝ ապամարդկայնացում (դեհումանիզացիա) և «հրեշացում» (դեմոնիզացիա). քարոզչական բոլոր նյութերում հայերը նախ զրկված են մարդկային կերպարանքից, ապա ներկայցվում են որպես չար, մութ ուժեր, որոնք մեղավոր են Ադրբեջանում տեղի ունեցող բոլոր ձախողումների, անգամ մարդկանց կենցաղային դժվարությունների ու անհաջողությունների համար: Քարոզչության ոլորտի հետազոտող, Razm.info կայքի համակարգող Կարեն Վրթանեսյանը ևս անդրադարձավ ադրբեջանական երիտասարդ սերնդի՝ հայկական այլատյացության հիման վրա դաստիարակության ծանր հետևանքներին: «Ադրբեջանում չի թույլատրվում մտածել պետական քաղաքական գծից դուրս, հատկապես երիտասարդների շրջանում իրավիճակն այնպիսին է, որ նրանց հետ պարզապես հնարավոր չէ խոսել, քննարկել: Ավագ սերնդից կան մարդիկ, որոնք հասկանում են, որ իրականությունն այլ է, բայց նրանք ստիպված լռում են, չնայած չեն էլ խրախուսում հակահայկական քարոզչությունը»,- ասաց նա։ Կարեն Վրթանեսյանն ընդգծեց, որ հետպատերազմական Գերմանիայում քաղաքացիների ապանացիֆիկացիայի օրինակով նման ապահայատյացության վերականգնողական գործողության կարիք կա և կլինի նաև Ադրբեջանում: «Հիմա շատերն են խոսում հայ-ադրբեջանական երկխոսության, հակամարտության կարգավորման մասին, սակայն առանց նման ռեաբիլիտացիայի նմանատիպ բոլոր քայլերը ձախողվելու են»,- ասաց մասնագետը: