Էրդողանը սպառնացել է ներխուժել անկախության հանրաքվե անցկացնող Քուրդիստան

Թուրքիայի նախագահ Ռեջեփ Թայիփ Էրդողանը հայտարարել է, որ իրենք չեն ընդունելու հյուսիսիրաքյան Քուրդիստանում անցկացվող անկախության հանրաքվեի արդյունքները՝ մի շարք սպառնալիքներ հնչեցնելով Քուրդիստանի հասցեին: Ըստ թուրքական «Diken.com» լրատվական կայքի՝ Էրդողանը տնտեսական պատժամիջոցներից ու շրջափակումից բացի սպառնացել է նաև ռազմական գործողություններ նախաձեռնել իրաքյան Քուրդիստանի դեմ: «Իրաքի սահմանադրական դատարանը անհրաժեշտ որոշումը կայացրել է (մերժելէ Քուրդիստանում հանրաքվեի անցկացումը-խմբ.):Մենք էլ անում ենք բոլոր քայլերը քաղաքական, տնտեսական, առևտրային ու անվտանգության ոլորտներում: Սիլոփիում մեր զինված ուժերը զուր չեն միջոցներ ձեռնարկում»,- ասել է Թուրքիայի նախագահը: Մանրամասնելով իրաքյա Քուրդիստանի դեմ նախատեսված քայլերը՝ Էրդողանն ասել է հետևյալը. «Մուտք ու ելքերը կփակվեն: Տեսնենք, թե դրանից հետո քրդական ինքնավարության ղեկավարությունը ինչպես է նավթը տեղափոխելու կամ վաճառելու: Փականը մեզ մոտ է: Երբ փակենք դա, այդ ժամանակ ամեն ինչ կվերջանա: «Եփրատի վահան» գործողությունը նախաձեռնելով՝ մենք թույլ չտվեցինք Սիրիայում ահաբեկչական պետություն ստեղծվի: Հարկ եղած դեպքում Իրաքում ևս նմանատիպ գործողություններ կիրականացնենք»,-սպառնացել է Էրդողանը: Վերջինս հայտարարել է, որ իրենց կողմից որևէ զիջում չի լինելու՝ նշելով, որ Իրաքի Քուրդիստանի դեմ ձեռնարկվելիք այլ միջոցների մասին կհայտարարեն օրերս: