ԱՄՆ-ի պատասխան քայլն Ալիևի սանձարձակությանը չի ուշանա
Այն, որ ՄԱԿ-ի ԳԱ շրջանակներում Հայաստանի ԱԳ նախարար Էդվարդ Նալբանդյանը Նյու Յորքում հանդիպելու է Ադրբեջանի արտգործնախարար Էլմար Մամեդյարովի հետ` ենթադրվում էր վաղուց, և այդ հանդիպման մասին խոսվել է դիվանագետների մակարդակով: Հայաստանի և Ադրբեջանի ԱԳ նախարարների վերջին հանդիպումը, հիշեցնենք, կայացել է այս տարվա հուլիսի 11-ին Բրյուսելում՝ ԵԱՀԿ Մինսկի խմբի համանախագահների նախաձեռնությամբ: Բայց ուշագրավն այն է, որ հանդիպման օրվա հետ կապված առաջին տեղեկությունը ստացվեց Ռուսաստանից դեռ 3 օր առաջ: Հայաստանի և Ադրբեջանի արտգործնախարարներ Էդվարդ Նալբանդյանի և Էլմար Մամեդյարովի միջև ԼՂ խնդրի կարգավորմանը նվիրված հանդիպումը տեղի կունենա սեպտեմբերի 23-ին Նյու Յորքում, հաղորդեց «Ինտերֆաքս» գործակալությունը՝ հղում անելով դիվանագիտական աղբյուրին: Այնուհետև «Ինտերֆաքսը» հավելեց, որ Հայաստանի և Ադրբեջանի նախագահների հնարավոր հանդիպման մասին տեղեկություններ առայժմ չկան: Եթե հաշվի առնենք այն հանգամանքը, որ ՄԱԿ-ի ամբիոնը Ալիևն ուղղակի օգտագործեց ղարաբաղյան հակամարտության թեման տեղափոխելով Սերժ Սարգսյանի քննադատելու անձնական դաշտ` վերհիշելով «Խոջալուն», ապա կարել է միանշանակ արձանագրել, որ Բաքուն ձգտում է ամեն գնով վիժեցնել ոչ միայն Նալբանդյան-Մամեդյարով հանդիպման հնարավոր առարկայական քննարկումները, այլև ավելի խորքային առումով` Սարգսյան-Ալիև հնարավոր հանդիպումը: Ռուսաստանն` իր հերթին չէր ցանկանա, որպեսզի նյույորքյան հարթակում որևէ էական նշանակության հանդիպում կազմակերպվեր: Միևնույն ժամանակ այս օրերին` Հայաստանի Անկախության 26-ամյակի առթիվ Հայաստանը նաև պաշտոնական Վաշինգտոնից էր շնորհավորանքներ ստանում: Հայաստանի Անկախության տոնի առթիվ նախագահ Սերժ Սարգսյանին շնորհավորական ուղերձ է հղել Ամերիկայի Միացյալ Նահանգների նախագահ Դոնալդ Թրամփը: Հայաստանի նախագահի աշխատակազմի հասարակայնության և տեղեկատվության միջոցների հետ կապերի վարչության փոխանցմամբ՝ ուղերձում մասնավորապես ասված է․ - «Միացյալ Նահանգների կառավարության և ժողովրդի անունից ցանկանում եմ շնորհավորել Ձեզ և Հայաստանի ժողովրդին անկախության հռչակման 26-րդ տարեդարձի առթիվ, որը նշվում է սեպտեմբերի 21-ին: Այս տարի մենք նաև նշում ենք մեր երկու երկրների միջև դիվանագիտական հարաբերությունների հաստատման 25 տարին: Ձեր անկախացումից ի վեր մենք աշխատել ենք միասին՝ մեր ընդհանուր շահերի ներքո աջակցելու Հայաստանի ժողովրդավարությանն ու տնտեսությանը: Մենք պատրաստ ենք շարունակել մեր աջակցությունը Հայաստանին նոր Սահմանադրության իրականացման ու կառավարման խորհրդարանական համակարգին անցում կատարելու հարցերում»: «Մենք ձգտում ենք ընդլայնել մեր երկրների համար երկուստեք շահավետ առևտրային ու ներդրումային կապերը: Մենք նաև բարձր ենք գնահատում Հայաստանի մասնակցություն միջազգային խաղաղապահ գործողություններին և ՆԱՏՕ-ի ու այլ բազմազգ վարժանքներին, մասնավորապես այս տարվա ամռանը տեղի ունեցած «Ազնիվ գործընկեր» վարժանքին, որը գլխավորում էր ամերիկյան կողմը», - գրում է Թրամփը: «Մենք գնահատում ենք Հայաստանի ցուցաբերած աջակցությունը սիրիացի փախստականներին: Մեկ անգամ ևս շնորհավորում եմ Ձեզ և հայ ժողովրդին ժողովրդավարության, անվտանգության և տարածաշրջանային կայունության հարցերում ունեցած առաջընթացի համար: Լավագույն մաղթանքներս այս տոնական օրվա ու առաջիկա տարվա համար», - ասված է ԱՄՆ նախագահի շնորհավորական ուղերձում: Իսկ ԱՄՆ պետքարտուղար Ռեքս Թիլերսոնը բարձր է գնահատել Հայաստանի գրանցած առաջընթացը։ «Մենք բարձր ենք գնահատում առաջընթացը, որը ձեր երկիրը գրանցել է անկախությունից հետո, և հպարտ ենք նրանով, ինչ արել ենք միասին։ Մենք լի ենք վճռականությամբ՝ Հայաստանում զարգացնել ժողովրդավարությունը, ինչպես նաև հուսալի և թափանցիկ տնտեսությունը։ Մենք շնորհակալ ենք ձեզ տարածաշրջանային կայունությանը և միջազգային խաղարարար գործողություններին հավատարիմ մնալու համար։ Մենք բարձր ենք գնահատում ամբողջ աշխարհում խաղաղություն պահպանելու այդ ջանքերը»,– ասել է Թիլերսոնը՝ հավելելով, որ ԱՄՆ–ը հույս ունի Հայաստանի հետ երկար տարիներ շարունակել բարեկամությունն ու գործընկերությունը։ Ըստ ամենայնի պաշտոնական Վաշինգտոնն առաջիկայում որոշակիորեն կձգտի ակտիվացնել ջանքերը ղարաբաղյան ուղղությամբ: Հարց է, թե Մոսկվային միայնակ կարգավորման գործընթացը ղեկավարելու «OK» կտա՞ Թրամփի վարչակազմը, թե՞ որոշակի առանձին խաղ կտանի նաև ղարաբաղյան ուղղությամբ` Հայաստանի և Ադրբեջանի հետ: Ամենայն հավանականությամբ առաջիկայում ԱՄՆ-ից որոշակի ազդակներ կլինեն: Թամար Բագրատունի