Մոսկվայում հայտնաբերվել է «Ռուկի վերխ» խմբի նախկին ստեղնաշարահար Վլադիմիր Կապիրինի դին

«Ռուկի վերխ» խմբի ստեղնաշարահար Վլադիմիր Կապիրինը մահացել է Մոսկվայում։ Այս մասին հայտնում է տելեգրամյան «112» ալիքը։

Երաժշտի մարմինը հայրը հայտնաբերել է հոկտեմբերի 5-ին Մոսկվայի Ելնինսկայա փողոցում։ Նրա խոսքով՝ որդին ալկոհոլի հետ կապված խնդիրներ է ունեցել։ Երաժշտի մարմնի վրա վնասվածքներ չեն հայտնաբերվել։

Ներկա պահին ոստիկանությունը հետաքննություն է անցկացնում կատարվածի առնչությամբ, հայտնում է Lenta.ru-ն։

Ինչպես հայտնում է РИА Новости-ն՝ վկայակոչելով հանգուցյալի հայր Դմիտրի Կապիրինին, նա «պառկած էր արյան լճակի մեջ՝ կոտրված գլխով»։

«Նա ասել էր ինձ, որ ինչ-որ մեկի հետ կոնֆլիկտի մեջ էր: Նրան մի անգամ նույնիսկ փողոցում մի փոքր ծեծել էին։ Ոչ ոք չգիտի՝ սա մահվան հետ կապ ունի՞»,- ասել է հանգուցյալի հայրը։

Նա պատմել է, որ գողացել են նաև իր որդու iPhone-ը և «զգալի քանակությամբ» գումար։ Նրա խոսքով՝ քննիչները սկզբում ակտիվորեն ուսումնասիրել են գործը, սակայն հետո հայտնել են, որ մահվան պատճառը ծեծը չէ։ Նրանք, սակայն, չեն հերքում մարմնական վնասվածք հասցնելու և գողության փաստերը, հավելել է Կապիրինը։

Իր հերթին, «ՌԻԱ Նովոստի»-ի աղբյուրը իրավապահ մարմիններում հայտնել է, որ Վլադիմիր Կապիրինի մահվան նախնական պատճառը սրտի անբավարարությունն է։ Վնասվածքներ չեն եղել, մասնավորապես՝ գլխի կոտրվածք, հավելել է նա։

Կապիրինի մահը «ՌԻԱ Նովոստի»-ի հետ զրույցում հաստատել է «Ռուկի վերխ»-ի համերգային տնօրեն Ռոբերտ Պողոսյանը։

Պողոսյանը նշել է, որ երաժիշտը չի աշխատել խմբում 2019 թվականից։

Վլադիմիր Կապիրինը ծնվել է 1987 թ. Եղել է ջազ դաշնակահար և հյուրախաղերով շրջագայել է «Ռուկի վերխ» խմբի հետ, ինչպես նաև համերգների համար մշակումներ է ստեղծել։ Իր երաժշտական ​​կարիերան սկսել է նվագելով «Խարիզմա» և Jazzmobile խմբերում։

 NEWS.am