Ղարիբաշվիլի. Մենք ցանկանում ենք շատ երկարաժամկետ գործընկերություն ունենալ Ադրբեջանի հետ

Վրաստանի վարչապետ Իրակլի Ղարիբաշվիլին այսօր՝ հոկտեմբերի 8-ին, Թբիլիսիում Ադրբեջանի նախագահ Իլհամ Ալիևի հետ համատեղ մամուլի ասուլիսում հայտարարել է, որ երկիրը ցանկանում է շատ երկարաժամկետ գործընկերություն ունենալ Ադրբեջանի հետ։

«Իլհամ Ալիևի հետ հանդիպմանը մենք խոսեցինք առևտրատնտեսական հարցերի մասին, քննարկեցինք էներգետիկայի, տրանսպորտի, լոգիստիկայի հարցերը։ Ադրբեջանը Վրաստանի հիմնական առևտրային գործընկերներից մեկն է՝ ամեն տարի հայտնվելով առաջին հնգյակում։ Այս տարի ապրանքաշրջանառությունն աճել է 15 տոկոսով, անցյալ տարի նույնպես ռեկորդային տարի ենք ունեցել»,- ասել է Վրաստանի վարչապետը։

Ղարիբաշվիլիի խոսքով՝ Վրաստանը շարունակում է Ադրբեջանի հետ երկարաժամկետ ռազմավարական գործընկերությունը։ Վրաստանը համակցված աշխատում է Ադրբեջանի և Ղազախստանի հետ Միջին միջանցքի զարգացման նախագծի վրա:

«Մենք սկսում ենք նաև Անակլիայի նոր նավահանգստի կառուցումը, վերջին փուլի ավարտից հետո նավահանգստի թողունակությունը կկազմի 100 մլն տոննա։ Շուտով կավարտվի նաև Արևելք-Արևմուտք արագընթաց ավտոմայրուղու շինարարությունը։ Այս բոլոր նախագծերում մենք համագործակցում ենք Ադրբեջանի հետ։ Բացի այդ, մի քանի ամսից կավարտվի պատմական և ռազմավարական նշանակություն ունեցող Բաքու-Թբիլիսի-Կարս նախագիծը, որը հաջողությամբ իրականացվում է։ Մենք ունենք շատ հստակ հեռանկար, ունենք երկարաժամկետ տեսլական։ Մենք ցանկանում ենք շատ երկարաժամկետ ռազմավարական գործընկերություն և բարեկամություն ունենալ Ադրբեջանի հետ։ Ես հավատում եմ մեր ընդհանուր տեսլականին»,- ասել է Ղարիբաշվիլին։

news.am