Պատերազմի հանցագործ Ալիևին ծառայել շտապող հայ էլ կա՞

Ադրբեջանական պաշտոնական աղբյուրները երեկ հաստատեցին, որ Արցախի նախկին նախագահներ Արկադի Ղուկասյանը և Բակո Սահակյանը, Ազգային ժողովի նախագահ Դավիթ Իշխանյանը տեղափոխվել են Բաքու: Այնուհետև նաև հաղորդվեց, որ Արցախի նախկին նախագահ Արայիկ Հարությունյանը ձերբակալվել է և նրան նույնպես տանում են Բաքու:

Արցախի պետնախարար Արթուր Հարությունյանը «Ազատությանը» փոխանցել է, որ ինքը, ԱԱԾ տնօրեն Արարատ Մելքումյանը, ներքին գործերի նախարար Կարեն Սարգսյանն ու նախագահի աշխատակազմի ղեկավարը ադրբեջանական անցակետով երեկ հասել էին Հայաստան։ Նախկին նախագահների ու խորհրդարանի նախագահի ձերբակալությունների վերաբերյալ որևէ մեկնաբանություն չտվեց։ Միայն ասաց՝ երբ իրենք ճանապարհվում էին, նրանք դեռ Ստեփանակերտում էին։ Այլ մանրամասներ  հնարավոր չէ ճշտել, քանի որ Արցախի հետ կապն ընդհատվել է, Արցախում այս պահին գործում է «Ազերտելեկոմը»։

Հիշեցնենք, որ Ադրբեջանն ավելի վաղ կալանավորել է Արցախում պաշտոնավարած չորս հոգու՝ նախկին պետնախարար Ռուբեն Վարդանյանին, նախկին արտգործնախարար Դավիթ Բաբայանին, Պաշտպանության բանակի նախկին հրամանատար Լևոն Մնացականյանին և ՊԲ հրամանատարի նախկին տեղակալ Դավիթ Մանուկյանին։ Այսօր արդեն շրջանառվեց Արցախի նախագահ Սամվել Շահրամանյանի ձերբակալման լուրը:
Ադրբեջանի կողմից լկտի պահվածքն ողջ քաղաքակիրթ աշխարհի աչքի առջև է: 10 ամսի ժողովրդին շրջափակման մեջ պահելով` Արցախի վրա հարձակում իրականացվեց, իսկ այժմ Արցախի ժողովրդի կողքին մնացածներին որպես «հանցագործ» ձերբակալում են:

Ու այս ձերբակալություններին զուգահեռ, երեկ տեղեկություն ստացվեց առաջին հայի մասին, ով պատրաստ է ծառայել Ալիևի հանցավոր ռեժիմին...

Արցախում առաջին հայը նշանակվել է Ադրբեջանի ներկայացուցիչ։ Այդ մարդը Սարգիս Գալստյանն է։ Ըստ Aravot.am-ի` Սարգիս Գալստյանը Շուշիի «Ավան պլազա» հյուրանոցի տնօրենն է եղել։ Սարգիս Գալստյանը 1990-ական թվականների այն ակտիվիստներից է, ովքեր ժողովրդական դիվանագիտության ջատագովներն էին և բավական հաճախ են այցելել Բաքու։

Կայքը միաժամանակ հիշեցրել է, որ 2020թ. 44-օրյա պատերազմից հետո, տեսանյութեր տարածվեցին, որտեղ Շուշիի «Ավան պլազա» հյուրանոցի աշխատակիցը հայտարարում էր, թե ինքը ազգությամբ ադրբեջանցի է, բայց 13 տարի բնակվում է Արցախում։ Միևնույն ժամանակ հայտնի է, որ Սարգիս Գալստյանն Արցախի խորհրդարանի «Արդարություն» խմբակցության ղեկավար Դավիթ Գալստյանի հորեղբոր որդին է։

Ահա, ազգային ստորացման ու նսեմացման օրեր են...

Անպատիժ Ալիևը ողջ աշխարհի աչքի առջև ձերբակալում է Արցախը պահածներին, միևնույն ժամանակ «պաշտոնի» նշանակում «ընտրյալ» հայերի, որոնք պատրաստ են ծառայել հայ ժողովրդի նկատմամբ ցեղասպանություն իրագործած պատերազմական հանցագործ Ալիևի բանդային:

Մետաքսյա Շալունց