«Ես Հմայակ Հովհաննիսյանի հետ ո՞նց համագործակցեմ». Վահրամ Մարտիրոսյան

Երեկ Շուշիի առանձնակի գումարտակի հրամանատար Ժիրայր Սեֆիլյանը հրապարակել էր տարբեր ոլորտներում հայտնի անձանց ցուցակ, որոնք, ըստ իրեն, կարող են փրկել հայկական պետականությունը։ Այդ ցուցակի մեջ տեղ էր գտել նաեւ արձակագիր Վահրամ Մարտիրոսյանի անունը։ «Ինձ համար անակնկալ էր դա, ասեմ, որ անգամ Ժիրայր Սէֆիլյանի հետ անձնապես ծանոթ չեմ»,- այսօր լրագրողների հետ հանդիպման ժամանակ ասաց գրող Վահրամ Մարտիրոսյանը` խոսելով Ժիրայր Սէֆիլյանի կոչի մասին: «Ստորև հրապարակում եմ (այբբենական կարգով) սույն դիմումի հասցեատերերի ցուցակը, որն, անշուշտ, սպառիչ չէ և պետք է համալրվի ինքնառաջադրման կամ երաշխավորության կարգով. Առաքելյան Արմինե, Անդրեասյան Կարեն, Ավետիսյան Վոլոդյա, Բադասյան Վահան, Բաղդասարյան Ալբերտ, Բարսեղյան Լևոն, Գրիգորյան Արմեն, Դիլբարյան Նարինե, Ենիգոմշյան Ալեք, Զոհրաբյան Ապրես, Իոաննիսյան Դանիել, Խառատյան Հրանուշ, Կարապետյան Ռուբեն, Կյուրեղյան Արմենակ, Հովհաննիսյան Արմեն, Հովհաննիսյան Թամար, Հովհաննիսյան Հմայակ, Հովհաննիսյան Րաֆֆի, Մակեյան Պետրոս, Մարտիրոսյան Արմեն, Մարտիրոսյան Վահրամ, Միքայելյան Սասուն, Պապյան Արա, Պետրոսյան Եղիշե, Ռուբինյան Կարապետ, Սանասարյան Դավիթ, Սաֆարյան Ստեփան, Փաշինյան Նիկոլ, Փոստանջյան Զարուհի, Օհանյան Սեյրան, Օսկանյան Վարդան»,- գրել է Ժիրայր Սէֆիլյանը։ Վ. Մարտիրոսյանը կարծում է՝ նման կոչ անելը Ժ. Սէֆիլյանի իրավունքն է. «Կարծում եմ, որ իր իրավունքն է այդպիսի կոչ անելը։ Ես պատրաստ եմ մասնակցել դիմադրությանը շատ հարցերում։ Թե որպես կազմակերպական միավոր ինչ տեսք կունենա այդ ճակատը, ինչ ծրագիր կունենա՝ դա կախված է որոշակի մարդկանց հետ քննարկումներից, որոշումներից։ Հմայակ Հովհաննիսյանը, որ կա այդ ցուցակում, «Գրիբոյեդով» ակումբի անդամ է, որը ռուսական ազդեցության մի գործիք է Հայաստանում։ Ես չեմ պատկերացնում, որ հետգաղութատիրական այս ճնշման պայմաններում համագործակցեմ Հմայակ Հովհաննիսյանի հետ։ Վերջին ելույթը, որ լսել եմ Հմայակ Հովհաննիսյանից, դա այն էր, որ ինքը Սերժ Սարգսյանին ասում էր, թե նա չի հասկացել Պուտինի ակնարկները եւ ընդառաջ չի գնացել նրան, այդ պատճառով էլ նա Հայաստանին պատժել է եւ զենք է մատակարարել Ադրբեջանին։ Ես չեմ կարող այդ մտածողության տեր մարդկանց հետ համագործակցել»,- ասաց Վահրամ Մարտիոսյանը։