Ինչպե՞ս է Սամվել Բաբայանը ժպիտով բարևել ադրբեջանցիներին, հետո իր ընկերներին «փուռը տվել»․ հարց ՔՊ-ականին (video)

Տեղեկացված եմ եղել, որ Սամվել Բաբայանը գնացել է ադրբեջանական կողմի հետ բանակցությունների եւ ինչ–որ համաձայնություններ եղել են։ Այս մասին այսօր՝ սեպտեմբերի 29-ին, լրագրողների հետ զրույցում ասաց ՔՊ-ական պատգամավոր Արմեն Խաչատրյանը։

«Սամվել Բաբայանի բանակցությունը չի նշանակում, որ Արցախի կառավարությունն է բանակցությունների գնացել, նա այնտեղ քաղաքական երկրորդ ուժն է ներկայացնում, նա տեսնելով ստեղծված իրավիճակը, տեսնելով, որ բանակցությունների չգնալը բերելու է աղետի, ինքն իր նախաձեռնությամբ գնացել է այդ բանակցություններին։ Այո, ես տեղեկացված եմ եղել, որ նա գնացել է այդ բանակցությունները եւ ինչ-որ համաձայնություններ եղել են, բայց քանի որ դա պաշտոնական Ստեփանակերտի կարծիքը չի եղել, այդ բանակցություններն արդյունք չեն տվել»,- ասաց Արմեն Խաչատրյանը։

Անդրադրադառնալով այն դիտարկմանը, որ Ադրբեջանն էր ասում, որ չի բանակցելու Արցախի իշխանությունների հետ, Խաչատրյանն ասաց․ «Ադրբեջանը կարող է շատ բան ասել։ Ադրբեջանը մի քանի անգամ համաձայնել է երկխոսության՝ որոշակի պայմաններով, բայց դրանք տարբեր պատճառներով տեղի չեն ունեցել։ Պատճառներից մեկն էլ երբեմն եղել է Ստեփանակերտի չցանկանալը»։

Հարցին՝ ինչպե՞ս է Բաբայանը Արցախի իշխանությունների թիկունքում նման պայմանավորվածությունների մեջ մտել, պատգամավորը պատասխանեց․

«Մանդատը տվել են, Արցախի նոր եկած իշխանություններն այդ մանդատը վերցրին, իշխանափոխություն արեցին, մանդատը վերցրին, համոզելով բոլորին, որ այդ մանդատը թույլ կտա Արցախի անվտանգային հարցերը լուծել եւ 5 օր հետո տեսանք՝ ինչ եղավ։ Սամվել Բաբայանը մինչեւ իշխանափոխությունը բազմիցս ասել է, որ եթե գնան այս ճանապարհով, Արցախի վրա հարձակում է լինելու եւ Արցախը կորցնելու են։ Ես նրան գնահատում եմ որպես հեռատես ռազմական եւ քաղաքական գործիչ, նա կանխատեսել է այս իրավիճակը, որ այսպես է լինելու եւ հանուն Արցախի գնացել է այդ բանակցություններին եւ ճիշտ է արել։ Արցախի նոր իշխանությունների այդ մանդատը օգտագործվեց կապիտուլյացիայի համար, իսկ Սամվել Բաբայանը, որ այդքան խնդրում ու ասում էր՝ ես ունեմ դրա լուծումը, կարող եմ գնալ բանակցել եւ այլն, նրան խաղից դուրս թողեցին եւ նույնիսկ այդ քննարկումների ժամանակ այնպես արեցին, որ Բաբայանը չմասնակցի»։

Հարցին՝ նման անձին ինչպե՞ս է հաջողվել ժպիտը դեմքին, ադրբեջանցիներին բարեւելով՝ անխափան անցնել, հետո ընկերներին «փուռը տալ», պատգամավորն արձագանքեց․ «Ինքը ընկերներին երբեք «փուռը տված» չկա։ Եթե գտնեք մի ընկեր, որին Բաբայանը «փուռն է տվել», կարող եք ասել։ Նրա մասին նման ձեւով խոսելը բարոյական չէ։ Նա տաղանդավոր ռազմական գործիչ է, նա կարող է հիմա էլ մտնել ու դուրս գալ, դա արտահայտվում է նաեւ իր այդպիսի տակտիկական խնդիրների լուծման ունակությամբ․ թող ոչ մեկ իր հետ ոտք չգցի»։