Ադրբեջանի հարձակումից հետո առաջին աղմկահարույց ձերբակալությունը

Ադրբեջանի կողմից ձերբակալվել է Լեռնային Ղարաբաղի նախկին պետնախարար Ռուբեն Վարդանյանը, երբ փորձել է անցնել Հայաստան։ Սա ադրբեջանական հարձակումից հետո առաջին աղմկահարույց ձերբակալություն է։ 

Այս մասին գրել է The Guardian-ը։ 

Չորեքշաբթի առավոտյան Լեռնային Ղարաբաղի Հանրապետության պետնախարարի պաշտոնը ժամանակին զբաղեցրած մեծահարուստ գործարար Ռուբեն Վարդանյանը մեկն էր այն ավելի քան 50,000 հայերից, ովքեր փախել են տարածաշրջանից ադրբեջանական վերահսկողությունից խուսափելու համար, նշել է բրիտանական հեղինակավոր պարբերականը։

Ըստ աղբյուրի, Վարդանյանն իր հարստությունը ներդրումային բանկային ոլորտում է վաստակել Ռուսաստանում՝ նախքան 2022 թվականին ԼՂ տեղափոխվելը, որտեղ նշանակվել է պետնախարար։ Նա պաշտոնանկ է արվել 2023 թվականի փետրվարին, բայց մնաց ականավոր դեմք Ղարաբաղում, որը հայերն անվանում են Արցախ։

Անցած շաբաթ Guardian-ին տված հարցազրույցում, նախքան ձերբակալությունը, Վարդանյանն ասել էր՝ գիտի, որ թիրախ կդառնա ադրբեջանական ուժերի համար, երբ անցած շաբաթ Ադրբեջանը հարձակվեց Ղարաբաղի վրա․

«Սա կյանք է։ Եթե դուք պատրաստ եք մեռնել ձեր երկրի համար, ապա դա լավ է: Բայց վատ է, եթե ինչ-որ կարևոր բան եք անում... պատմության վերջը կարող է շատ վատ լինել: Եվ ես պատրաստ էի դրան առաջին օրը, ես դա գիտեի»:

Քանի որ ադրբեջանական ուժերը տեղափոխվել են գյուղեր և քաղաքներ, Ղարաբաղի բնակչության ավելի քան 40%-ը տարհանվել է 72 ժամում, գրել է The Guardian-ը։

Իր հարցազրույցում, ինչպես նշում է պարբերականը, Վարդանյանը մեղադրել էր Ադրբեջանի նախագահ Իլհամ Ալիևին Լեռնային Ղարաբաղում հայերի դեմ «էթնիկ զտումների» արշավ սկսելու մեջ և կոչ էր արել պատժամիջոցներ կիրառել Ադրբեջանի դեմ։

Նրա կինը՝ Վերոնիկա Զոնաբենդը, հաստատել է նրա ձերբակալությունը, շարունակում է բրիտանական թերթի հոդվածագիրը և մեջբերում Վարդանյանի կնոջ խոսքերը․ «Ամուսինս՝ բարերար, գործարար և Արցախի նախկին պետնախարար Ռուբեն Վարդանյանը, Ադրբեջանի իշխանությունների կողմից ձերբակալվել և գերության մեջ է գտնվում ՝ այսօր առավոտյան, երբ նա փորձում էր հեռանալ ադրբեջանական օկուպացիայից մազապուրծ եղած հազարավոր հայերի հետ»։

Զոնաբենդը Guardian-ին ասել է, որ իր ամուսնու ձերբակալության մասին իմացել է լրատվամիջոցների հաղորդագրություններից և դրա կադրերն անվանել «ուղղակի սարսափելի»: 

«Նա երեկ երեկոյան հաղորդագրություն է թողել՝ ասելով, որ ապահով է, բայց ես չգիտեի նրա հստակ ծրագրերը։ Սեպտեմբերի 19-ից զանգում էր և ասում, որ ողջ է»,-պատմել է Վարդանյանի կինը։

Ադրբեջանի կառավարությունը նախկինում հայտարարել էր, որ մտադիր է ձերբակալել Վարդանյանին, թեև չորեքշաբթի օրը նրան առաջադրված մեղադրանքները չեն հրապարակվել, հիշեցնում է պարբերականը։