Նյույորքյան տուռնե` «սելֆիներով», ծամածռություններով ու ջղաձիգ նոպաներով

ՄԱԿ-ի ամբիոնից Սերժ Սարգսյանի 15 րոպե տևած ելույթի ամենածավալուն հատվածն, իհարկե, նվիրված էր ղարաբաղյան հակամարտությանը: ՄԱԿ-ի բարձր ամբիոնից Սերժ Սարգսյանը հայտարարեց` կողմերը դեռ շատ հեռու են խաղաղությունից` դրանում մեղադրելով պաշտոնական Բաքվին: «Անցած տարվա ապրիլին Ադրբեջանի սանձազերծած քառօրյա պատերազմն ապացուցեց, որ Ադրբեջանը շարունակում է հետապնդել Արցախի ժողովրդին բնաջնջելու իր նպատակը: 2016 թվականին ծավալված ռազմական գործողությունների ընթացքում Ադրբեջանի զինված ուժերը կատարել են պատերազմի մի շարք հանցագործություններ քաղաքացիական բնակչության և ռազմագերիների հանդեպ», - փաստեց Հայաստանի նախագահը: Վերստին ընդգծելով, որ հակամարտության խաղաղ կարգավորումն այլընտրանք չունի, Սերժ Սարգսյանն առանձնացրեց երկու նախապայման` Արցախի ժողովրդի ազատ կամարտահայտության իրավունքն ու անվտանգության ապահովումը: «Մնացած հարցերն ածանցյալ են և կլուծվեն խնդրի կարգավորմանը զուգահեռ», - հայտարարեց Հայաստանի նախագահը: «Կարգավորման ինչ տարբերակի էլ հանգենք, միևնույն է, Արցախի Հանրապետությունը չի կարող ունենալ ավելի ցածր կարգավիճակ և վայելել ավելի քիչ ազատություն, քան այսօր ունի: Ադրբեջանը պետք է ճանաչի և հարգի Արցախի ժողովրդի կողմից իր ապագան ազատ կամարտահայտությամբ որոշելու իրավունքը, իսկ արցախահայության անվտանգությունը պետք է երաշխավորված լինի բոլոր հնարավոր միջազգային և ներքին մեխանիզմներով»: Սա, կարելի է ասել, Սերժ Սարգսյանի կողմից կոշտ շեշտադրումներով դիրքորոշում էր: Ոչ միայն Ադրբեջանին, այլև միջազգային հանրությանն ուղղված ուղերձ էր այն մասին, որ անհարկի զիջումներ պաշտոնական Երևանից չսպասեն: Բացի այդ, այս ելույթը հնչեց Նալբանդյան-Մամեդյարով հանդիպումից առաջ, որի ընթացքում պետք է քննարկվեին Սարգսյան-Ալիևի հանդիպման կազմակերպման մանրամասները: Բայց ինչ հանդիպում` ՄԱԿ-ում այսպիսի դիրքորոշումների դեպքում: Իր հերթին Ալիևին էլ, կարծես, Սերժ Սարգսյանի ելույթի շեշտադրումներից «ափերից դուրս եկած»` սպառնացել է Հայաստանին, թե`«անհրաժեշտության դեպքում` Հայաստանը նորից կպատժվի»: Կրկին յոթ երգ, յոթն էլ` ««ադրբեջանական տարածքների 20 տոկոսի» մասին, դարձյալ` «Հայաստանը անտեսում է ՄԱԿ-ի Անվտանգության խորհրդի 4 բանաձևերը», ապա ուղիղ սպառնալիք. «Անհրաժեշտության դեպքում, ինչպես անցած տարվա ապրիլին, Հայաստանը նորից կպատժվի: Հայ-ադրբեջանական Լեռնային Ղարաբաղի հակամարտությունը պետք է կարգավորվի միջազգային նորմերի սկզբունքների հիման վրա՝ Ադրբեջանի տարածքային ամբողջականության շրջանակներում»: Փաստորեն, «Ադրբեջանական լվացքատան» խայտառակությունից հետո Ալիևը որոշել է ավելի ուժեղ գոռալ, և անցյալ տարվա պատերազմի պատասխանատվությունն ու նախաձեռնությունը գցելով հայկական կողմի վրա: Ինչ սպասես մի երկրի առաջնորդից, որ այդ բարձր ամբիոնն օգտագործում է ոչ թե շաբաթներ առաջ խայտառակված երկրի վարկանիշի վերաբերյալ խոսելու, այլ Հայաստանին սպառնալու համար: Ու չնայած կոռուպցիայի ու մարդու իրավունքների ոտնահարման մասին իրավապաշտպանների ու միջազգային կազմակերպությունների շարունակական ահազանգերին՝ Ալիևն ասել է՝ Ադրբեջանը ժամանակակից, կայուն ու ժողովրդավար երկիր է: «Հիմնարար բոլոր իրավունքները մեր երկրում երաշխավորված են այդ թվում՝ խոսքի ու հավաքների ազատությունը», - հայտարարեց Ադրբեջանի առաջնորդն՝ այդպես էլ չանդրադառնալով իր հասցեին հնչող քննադատությանը՝ լրագրողներին ազատազրկելու, ընդդիմախոսներին բռնի ճնշելու, բռնապետական կառավարումն ամրապնդելու վերաբերյալ: Ի դեպ, Ալիևի ելույթն ունկնդրելու համար ՄԱԿ-ի Գլխավոր նստաշրջանի դահլիճ էին եկել ոչ միայն նրա կինը՝ փոխնախագահ Մեհրիբան Ալիևան, այլև դուստրը՝ Լեյլան, որը ՄԱԿ-ի վեհաժողովի ֆոնին` հոր ելույթի ժամանակ «սելֆի» էր անում` ծամածռելով դեմքը: Ու նաև պարզվեց, որ Ալիևների ընտանիքը Նյու Յորքում էր, որպեսզի լուսանկարվեր Թրամփի ու տիկնոջ` Մելանիայի հետ, որը նրանք հաջողացրել են ԱՄՆ նախագահ Դոնալդ Թրամփի կողմից ի պատիվ ՄԱԿ-ի Գլխավոր ասամբլեայի 72-րդ նստաշրջանին մասնակցող երկրների պատվիրակությունների ղեկավարների տրված ընդունելության կուլիսներում` տարածելով մի անորակ նկար: Ու մինչ Ալիևների ընտանիքը լուսանկարվում ու «սելֆի» էր անում Նյութ Յորքում` Արցախ ժամանեցին ԱՄՆ Ներկայացուցիչների պալատի անդամներ Ֆրենք Փալոունը և Թուլսի Գեբըրդը, որոնք ճիշտ նույն օրը Արցախի խորհրդարանում ելույթ էին ունենում: Ահա, այսպիսի իրողություններ... Թամար Բագրատունի