Ասեք, որ հետեւում եք ԱԻՄ-ին, որը քաղաքական կյանքում բոլորի պապան է, մաման է

ԱԻՄ առաջնորդ Պարույր Հայրիկյանն անիմաստ է համարում մեկնաբանել Հայաստանի արգործնախարարի աղմկահարույց ելույթը տարածքների հանձնման վերաբերյալ․ «Ես կարդացի մի վերնագիր, որ Նալբանդյանի ելույթը հակասում է ՄԱԿ-ում Սերժ Սարգսյանի ելույթին, հետեւաբար ինչ իմաստ ունի մենկաբանել այս բարդակի ելույթները, այստեղ իշխանություն չկա, սովորաբար այդպես է լինում, երբ դու ինքնուրույնություն չունես, երբ դու ինչ որ խամաճիկի խամաճիկն ես։ Հիմա ես չեմ փորձելու խորանալ այդ ամենի մեջ, խորանալ, վերլուծել, դա կնշանակի լուրջ վերաբերել, իրենք ժամանակավրեպ են»,- մեզ հետ զրույցում կարծիք հայտնեց Պարույր Հայրիկյանը։ Հիշեցնենք, որ Հայաստան-Սփյուռք 6-րդ համահայկական համաժողովի բացման օրը Էդվարդ Նալբանդյանը հայտարարեց, որ Ադրբեջանի հետ քննարկում են մի շարք տարածքների հանձնման հարցը՝ «այն տարածքների, որոնք անվտանգության տեսակետից սպառնալիք չեն ստեղծի ո՛չ Ղարաբաղի, ո՛չ հարցի կարգավորման համար»: «Հայաստանը բազմիցս հայտարարել է, որ ընդունում է եռանախագահների այս առաջարկությունները, այս սկզբունքները՝ որպես բանակցությունների հիմք»,-ասաց Նալբանդյանն ու ավելացրեց:-«Ամեն անգամ, երբ եռանախագահները հանդիպումների արդյունքներով հայտարարություն են տարածում, ջրի երես է դուրս գալիս, թե որքան իրականությունից հեռու են ադրբեջանական կեղծիքները, եւ որքան համահունչ են միջազգային հանրության մոտեցումները մեր տեսակետների հետ»: Անդրադառնալով խորհրդարանական Ելք խմբակցության ԵԱՏՄ-ից դուրս գալու նախագծին, որն անցած շաբաթ դրվել է շրջանառության մեջ եւ դրա վերաբերյալ քննադատություններին, թե իշխանություններին է այդ նախաձեռնությունը ձեռնտու, քանզի այդկերպ փորձելու են Ռուսաստանից որոշակի զիջումներ կորզել, Հայրիկյանն արձագանքեց․«Իշխանություն պետք է լինի, որ իրեն էլ ձեռնտու լինի։ Ինչ է ուզում եք ասել, որ Պուտինին ձեռնտու՞ է, որ իր կազմից դուրս գան։ Իսկ Սերժ Սարգսյանը ինքնուրույն միավոր չէ, Պուտինի խամաճիկն է։ Ես կարծում եմ, որ այդ կարծիքը հիմքեր չունի։ Ինչ է Հայաստանում առողջ մտածելու կարողությամբ մարդ չի՞ մնացել, բոլորը պետք է խամաճիկներ լինեն, կարող է այդ մարդիկ էլ մի քիչ մտածելու ընդունակ են եւ մտածել ու տվյալ եզրակացությանն են հանգել։ Պետք չէ ամեն ինչ կորած համարել։ Կարող եմ ասել, որ այս խորհրդարանում այդ նախաձեռնությունը հեռանկար չունի։ Եթե Սերժ Սարգսյանը մի գիշերվա մեջ Պուտինի կապանքներից ազատվի, մի գիշերվա մեջ էլ հանդիպի Թրամփի պես մեկին, նա էլ ասի՝ տղա ջան, ինչ ես գլուխդ կորցրել, դու քաղաքակրթական ընտրությունից խուսափո՞ւմ ես եւ ամբողջ պառլամենտ մի գիշերվա մեջ կդառնա ԱԻՄ-ական, ինչպես 1991 թվականի սեպտեմբերի 21-ին, բոլորը դարձան ԱԻՄ-ական եւ քվեարկեցին անկախության օգտին, մինչ այդ ասում էին ԱԻՄ-ը սխալ է, ծայրահեղական է եւ այլն»։ Նշենք, որ Ելք խմբակցության պատգամավոր Արամ Սարգսյանը հայտարարել է, որ իրենք քաջ գիտակցում են, որ ՀՀԿ-ն, որը խորհրդարանում մեծամասնություն ունի, կտապալի նախագիծը, իրականում ԵԱՏՄ-ից դուրս գալու նախաձեռնությամբ Ելք-ը ցանկանում է ժողովրդի գիտակցությունը փոխել։ Անդրադառնալով այս հայտարարությանը Հայրիկյանը ասաց․«Մի քիչ մեծամիտ է ասված, որովհետեւ ժողովուրդը 70 տոկոսով կողմ է Եվրոպայի հետ համագործակցության խորացմանը, սա մենք ենք ստուգել ամենալուրջ գիտական հարցումներով։ Պառլամենտական քաղաքական ուժի առաքելությունը ժողովրդի գիտակցությունը բարձրացնելը չէ, դա վերլուծաբանների, լրագրողների, հոդվածագիրներին թող մնա, թող ասեն այսինչ գործն ենք անում, բարոյական նպատակների մասին խոսելը տեղին չէ։ Ասեք, որ մեր գործն ենք անում, պետք է համոզենք, որ սխալ ճամփի վրա եք, ճիշտն էլ սա է, մենք էլ հետեւում ենք ԱԻՄ-ին, որովհետեւ ԱԻՄ-ը էական ներդրում ունի մեր ազգային-քաղաքական կյանքում, բոլորի պապան է, մաման է, կամ ինչպես Լեւոն Տեր-Պետրոսյանը կասեր բոլորի համար ճանապարհ բացող ուժն է։ Մենք մեր հայրերի պատվերով կհասնենք առաջընթացի, որովհետեւ սա քաղաքակրթական ընտրություն է»։ Անի Սահակյան