Փաշինյանի իշխանությունը մազից է կախված

«Հրապարակ»-ը գրում է .

Չնայած Հայաստանի ռազմավարական դաշնակիցը Ռուսաստանն է, սակայն տպավորություն է, թե Ադրբեջանի հանդեպ ՌԴ-ն առավել ներողամտաբար է տրամադրված, իսկ Հայաստանին շատ հաճախ մեղադրում է տարատեսակ սխալների եւ բացթողումների մեջ` արդարացնելով իր չեզոք կեցվածքը: Երեկ էլ ՌԴ նախագահ Վլադիմիր Պուտինը, ըստ էության, մեղադրել է Հայաստանի նախկին ու ներկա իշխանություններին, թե Ռուսաստանը ցանկացել է Քարվաճառն ու Լաչինը թողնել Հայաստանին, սակայն հայկական կողմը հրաժարվել է՝ ասելով` կմարտնչենք: Մարիա Զախարովան էլ արդեն մի քանի օր է՝ հայկական կողմին մեղադրում է ոչ բարյացակամ վերաբերմունքի, դաշնակցային հարաբերությունների տրամաբանությունից դուրս գործողություններ կատարելու մեջ: Իսկ երբ Ադրբեջանն առավել հակառուսական կեցվածք է դրսեւորում, ռուսական իշխանություններն աչք են փակում դրա վրա:

Նշենք, որ Ադրբեջանի ԱԳՆ-ն հայտարարել էր, որ տեղական վերջին ընտրությունները, որոնք անցկացվել են Ուկրաինայից անջատված Դոնեցկի, Լուգանսկի, Զապորոժիեի, Խերսոնի մարզերի տարածքներում, չեն համապատասխանում միջազգային չափանիշներին եւ իրավական ուժ չունեն։

Ռուս քաղաքագետ Մոդեստ Կոլերովը «Հրապարակի» հետ զրույցում նշեց, որ չի կիսում մեր այն տեսակետը, թե Ռուսաստանն Ադրբեջանի հանդեպ ներողամտաբար է տրամադրված: «ՌԴ ԱԳՆ ներկայացուցիչ Մարիա Զախարովան հստակ հայտարարել է, որ Ադրբեջանի դիրքորոշումը հարիր չէ դաշնակից պետության վարքագծին: Զախարովան նշել է, որ Ադրբեջանին դեմարշ են հայտարարում եւ չեն ընդունում այդ տեսակ հայտարարությունը, եւ որ Բաքվում ՌԴ տարածքային ամբողջականության հանդեպ պետք է նույնքան հարգանքով վերաբերվեն, որքան մեզնից են պահանջում վերաբերվել իրենց տարածքային ամբողջականությանը։ Այնպես որ՝ այն պնդումը, թե Ռուսաստանն աչք է փակում կամ չի նկատում, կամ էլ նկատում, սակայն լռում է, իրականությանը չի համապատասխանում»,- նշում է ռուս քաղաքագետը: Նա չգիտի, թե ինչու է Ադրբեջանը նման հայտարարություն անում, կարծում է, որ Ադրբեջանի կողմից արվող պրոցեսներին անդրադառնալու փոխարեն ավելի ճիշտ կլինի մտածել Հայաստանի Հանրապետության մասին, որը «կործանման շեմին է կանգնած»:

Կոլերովն ասում է. «Ես կանխատեսում էի արել, որ Հայաստանը կործանվելու է շուտով, եւ հիմա էլ իմ այդ կանխատեսումը պնդում եմ: Հայաստանի գործող իշխանությունների այսօրվա հայտարարություններն ու գործողությունները, Ղարաբաղն Ադրբեջանի մաս ճանաչելն ու Ռուսաստանի հետ հարաբերությունները փչացնելը ուղիղ քայլերով Հայաստանը տանում են դեպի կործանում: Հայաստանի Հանրապետության պետականությունն այսօր լուրջ վտանգի առաջ է կանգնած, եւ հայ ժողովուրդն այդ մասին պետք է նախ մտածի: Այն, ինչ Նիկոլ Փաշինյանն է անում, ուղղակի սարսափելի է, կործանարար եւ վտանգավոր: Ես չգիտեմ, թե ինչու է հայ հասարակությունն այսքան հանգիստ եւ հանդարտ, սակայն վստահ կարող եմ ասել, որ Փաշինյանի իշխանությունն իրավիճակը փոխելու ցանկություն անգամ չունի, եւ, մեծ հաշվով, դա այնքան էլ իրատեսական չէ այսօր»:

Մոդեստ Կոլերովն այս խոսքերից հետո նշում է, որ վստահ է` «Հրապարակ» օրաթերթը «շատ համարձակ եւ ազնիվ օրաթերթ է» եւ անպայման իր բոլոր տեսակետները հրապարակելու է: Քաղաքագետը կարծում է, որ «Հայաստանի ժողովրդավարություն» ասվածը կեղծ է, խոսքի ազատությունը` վտանգված, իսկ շատ լրատվամիջոցներ համարձակություն չեն ունենում հրապարակել իր տեսակետները. «Հայաստանում ամեն օր հակառուսական տրամադրություններն ավելի են մեծանում, եւ դա գիտե՞ք ինչի արդյունք է, դա Նիկոլ Փաշինյանի տապալված իշխանության վերջին ճիգերի արդյունքն է: Նիկոլ Փաշինյանի Հայաստանը տապալված է: Հակառուսական տրամադրությունները եւս այդ մասին են վկայում: Նիկոլ Փաշինյանի իշխանությունը մազից է կախված: Այն ամենը, ինչն այսօր կատարվում է Հայաստանում, փաստում է հենց այդ մասին: Լեռնային Ղարաբաղի մասին այս պարագայում խոսելն ավելորդ է: Նիկոլ Փաշինյանը Ղարաբաղը տեսնում է բացառապես Ադրբեջանի կազմում»: