Անիմաստ է համարում. էքստրասենսի սպանության մեջ մեղադրվողը ասելիք ունի

Մխիթար Մոս-Մուշեղյանը 4 օր առաջ դադարեցրել է հացադուլը: Էքստրասենս Անի Մաջնունյանի սպանության մեջ մեղադրվող երիտասարդի պաշտպանը` Մարինե Ֆարմանյանը  Հայելի.am -ի թղթակցի հետ զրույցում հայտնեց, որ անիմաստ է համարում հացադուլի շարունակումը: «Իմ պաշտպանյալի պահանջները չեն բավարարվել, երևի հասկացավ, որ հեռանկար չկա, իմ հորդորները լսելով դուրս է եկել հացադուլից »,-ասաց պաշտպանը: Մխիթար Մոս Մուշեղյանն ի դեպ լրագրողներին հրավիրում է քրեակատարողական հիմնարկ: Նա կապ է հաստատել լրատվական կայքերի հետ և խնդրել այցելել իրեն ու լսել իր խոսքը: Նշենք, որ «Յանուս» թատրոնի գեղարվեստական ղեկավարը հացադուլը սկսել էր հունվարի 29-ից, պահանջում էր, որ մեկ անձի իրարամերժ վկայությունների հիման վրա իրեն ազատությունից չզրկեն: «Սովորական դատավարություն է ընթանում, մինչև մեկ տարի նախաքննությունը կարող է շարունակվել: Իրավական առումով սա նորմալ է, այլ հարց է, թե ինչ հոգևիճակում է իրեն մեղավոր չճանաչող պաշտպանյալս »,-ընդգծեց Ֆարմանյանը: Հիշեցնենք, որ 2015 թվականի օգոստոսի 5-ին ահազանգ է ստացվել, որ Աջափնյակ վարչական շրջանի բնակելի բազմահարկ շենքերից մեկի բնակարանում հայտնաբերվել է կնոջ դի։Բնակարանի ննջարանի հատակին հայտնաբերվել է տանտիրուհու՝ 1960թ. ծնված Անի Մաջնունյանի դիակը՝ կտրող-ծակող առարկայով պատճառված բազմաթիվ մարմնական վնասվածքներով։ Դիակի զննությամբ հայտնաբերվել է դանակի շեղբ՝ մարմնի մեջ։ Դեպքի վայրի զննությամբ պարզվել է, որ տան իրերն ամբողջությամբ եղել են տակնուվրա արված, կահույքի դարակները՝ հանված, հագուստները՝ թափթփված։ Գործով մեղադրյալ է «Յանուս» թատրոնի գեղարվեստական ղեկավար  Մխիթար Մոս-Մուշեղյանը: Աստղիկ Ավագյան