Զգլխիչ խրախճանք՝ պաշարման ժամանակ կամ հոգեմտավոր կոռոզիա

Համացանցում արագորեն տարածվող տեսանյութերը բնորոշվում են որպես «վիրուսային»: Այդպիսի մի «վիրուսային» տասանյութ էլ «Տիկտոկ» ցանցում է հրապարակվել. ինչ-որ ռեստորանում Երևանի Կենտրոն վարչական շրջանի ղեկավար Սամվել Ղուկասյանն ինչ-որ քեֆ-ուրախության ընթացքում ափսեներով հարվածում է քեֆի մասնակիցներից մեկի գլխին...

Տեսանյութում պատկերված է, թե ինչպես են մի «օբյեկտի» պարահրապարակում մի խումբ անձինք «տժժում», ակնհայտորեն խիստ բարձր տրամադրությամբ, իսկ պարող տղամարդկանցից մեկի գլխին մեկ ուրիշ տղամարդ հարվածում է ափսեներով ու ջարդում ափսեները: Չէ՛, դա ինչ-որ «կատաղած» ռեստորանային կռիվ-ծեծկռտուք չէ, բռնություն չէ: Հակառակը՝ ափսեներով պարողի գլխին հարվածում են այսպես ասենք՝ փոխադարձ համաձայնությամբ ու, կներեք արտահայտության համար՝ «կայֆով» ու «Մակարենայի» զգլխիչ ելևէջների ներքո: Ավելին, հավեսի ընկած անձնավորությունը նաև ինքն է վերցնում հատուկ այդ նպատակով առաջարկվող ափսեները և, ինքն իր գլխին հարվածելու միջոցով, ջարդում դրանք:

Ըստ մամուլի հրապարակումների, ափսեով հարվածողը Կենտրոն վարչական շրջանի ղեկավար Սամվել Ղուկասյանն է: Ավելին, shamshyan.com-ը հաղորդում է, որ հիշյալ «ափսեատյաց» քեֆ-ուրախությունը, որին հիմա «փարթի» են ասում, տեղի է ունեցել օրեր առաջ, Երևանի Պուշկինի 38 հասցեում գործող Yassou ռեստորանային համալիրում, հիշյալ օբյկտի 1 տարվա գործունեության տարեդարձի առթիվ: Ըստ աղբյուրի, հիշյալ համալիրը պատկանում է դիզայներ, երգչուհի Անահիտ Սիմոնյանին: Նա ներկա է եղել միջոցառմանն ու տեսել է, թե ինչպես են իր հաստատության կահ-կարասին «օգտագործում»:

Դե ինչ, կարելի է ասել, որ պարելուն զուգընթաց միմյանց գլխին ափսեով հարվածելը «բովանդակալից հանգստի» նոր մոդա է՝ Նիկոլ Փաշինյանի ու նրա կողմնակիցների, Տիգրան Ավինյանի ու Կենտրոն վարչական շրջանում նրա ներկայացուցչի համար: Հուսանք, շուտով նրանք ափսեներից անցում կկատարեն փրփրագինու, նույն ինքը՝ շամպայնի շշերին և հերթական խրախճանքի, քեֆ-տժժիկի ընթացքում կսկսեն շամպայնի շշերով մեկը մյուսի գլխին հարվածել: Կամ ապակյա ափսեներից կանցնեն մետաղյա թասերին: Չնայած, իրենց «գաղափարական» առաջնորդը մուրճ էր ճոճում, ավելի լավ է մուրճերին անցնեն:

Ինչևէ, հարցն այն չէ, թե փաշինյանական «էլիտան» հատկապես ինչ խոհանոցային կամ սպասքի ինչ պարագաներ է օգտագործում՝ քեֆի ընթացքում սրա-նրա գլխին հարվածելու և դրանից հավելյալ հաճույք ստանալու նպատակով:

Առանցքային հարցն այն է, որ Նիկոլ Փաշինյանը, Տիգրան Ավինյանը՝ ի դեմս նրանց ներկայացուցիչ Կենտրոն վարչական շրջանի ղեկավարի, ինքնամոռաց քեֆ-ուրախության, խրախճանքների, «էլիտար կայֆերի» մեջ են, հիմա՛, մեր օրերում, Արցախի պաշարման, Արցախի հայության օրհասական վիճակի պայմաններում:

Վիճակ, որ մեծ հաշվով, հենց իրենք՝ Փաշինյանն ու նրա կողմնակիցներն էլ ստեղծել են՝ ուրանալով Արցախը:

Սա ավելին է, քան պարզապես խրախճանքըը՝ ժանտախտի ժամանակ: Սա հոգեմտավոր կոռոզիա է: Ու սրանց և սրանց նմանների իշխանությունից ժամ առաջ պետք է ազատել Երևանն ու Հայաստանը, եթե ուզում ենք էդ մարդակեր ժանգից պրծնել:

Արթուր Խայթ

7or.am