Արմեն Մարտիրոսյան. Ինչպես իշխանությունը որոշի, այնպես էլ կլինի

«Շատ դրական եմ վերաբերվում այն հանգամանքին, որ «Ելքի» մեր գործընկերները որոշակի զիգզագներից հետո եկան այն տեսակետին, ինչ հայտնում էր «Ժառանգությունն» ի սկզբանե՝ 2013 թվականի սեպտեմբերի 3-ից», - «168 ժամի»-ի հետ զրույցում ասել է «Ժառանգություն» կուսակցության փոխնախագահ Արմեն Մարտիրոսյանը՝ խոսելով «Ելքի»՝ ԵԱՏՄ-ից դուրս գալու նախաձեռնության մասին։ Խոսելով այն մասին, թե իրենք կաջակցե՞ն այդ նախաձեռնությանը, Ա. Մարտիրոսյանն ասել է, որ, եթե իրենց կդիմեն, այդ ժամանակ կքննարկեն այդ խնդիրը։ Հարցին՝ այնուամենայնիվ, հասարակության անհրաժեշտություն էլ կլինի՞, Ա. Մարտիրոսյանն այսպես է պատասխանել. «Բնականաբար, դա այնպիսի խնդիր է, որ միայն խորհրդարանով հնարավոր չէ դրական արդյունք արձանագրել, որովհետև ակնհայտորեն արդեն իսկ Արմեն Աշոտյանի ու Էդուարդ Շարմազանովի շուրթերով իշխանությունն իր բացասական կարծիքը հայտնել է, և ակնհայտ է, որ քվեարկությունն ինչպես իշխանությունը որոշի, այնպես էլ կլինի»։