Սյունիքի մարզպետի գործարքը

Սեպտեմբերի 8-ին հրաժարական ներկայացրեց Գորիս համայնքի ղեկավար Վաչագան Ադունցը: Նա Գորիսի քաղաքապետի պաշտոնը ստանձնել էր 2014թ. հունիսի 8-ին եւ այս 3 տարիների ընթացքում երկու անգամ ընտրվեց համայնքի ղեկավար: Երկրորդ ընտրությունը մոտ մեկ տարի առաջ էր՝ 2016 թ.-ի սեպտեմբերի 18-ին, որի արդյունքներով նա ստանձնեց Գորիս քաղաքի հետ մեկ համայնքում միավորված 11 գյուղերի ղեկավարի պաշտոնը:Ադունցը համարվում էր նախկին մարզպետ Սուրիկ Խաչատրյանի մարդը: Երկու ընտրությունների ժամանակ էլ իշխող ուժը ամեն ինչ արել է, որ նա ընտրվի քաղաքապետ: 2014 թ.-ի հունիսի 8-ին տեղի ունեցած ՏԻՄ ընտրությունների ժամանակ Գորիսում բավականին լարված իրավիճակ էր, թեկնածուներից 2-ը ինքնաբացարկ ներկայացրին: 2016 -ի ՏԻՄ ընտրությունների ժամանակ առաջադրված երկրորդ թեկնածուն՝ Որոտան համայնքի ղեկավար Սուրիկ Օհանջանյանը, նույնպես ինքնաբացարկ հայտնեց:Ընտրվելուց ամիսներ անց, գարնանը կայացած խորհրդարանական ընտրություններից առ ժամանակ հետո հրաժարականի պահանջ ներկայացվեց նաեւ Ադունցին:Իսկ ներկայացնողը՝ ըստ մամուլի տեղեկությունների Սյունիքի գործող մարզպետ Վահե Հակոբյանն է եղել, որը կրկին նույն տեղեկություններով այդ պաշտոնը խոստացել էր գործարար Առուշ Առուշանյանին, քանի որ նրա հայրը ապրիլի 2-ին տեղի ունեցած խորհրդարանական ընտրությունների ժամանակ մեծ գումարներ է ծախսել ՀՀԿ-ի համար, սակայն նրան չի հաջողվել որդու համար պատգամավորի մանդատ ստանալ:Հանրապետական մարզպետ Վահե Հակոբյանը փոխարենը Առուշանյանին խոստացել է Գորիսի համայնքապետի պաշտոնը: Թե ինչու չհաջողվեց հաղթած թեկնածուին պատգամավոր դարձնել, այդ պատմությունն էլ տեղ գտավ մամուլում: Ընտրություններից հաշված օրեր հետո, երբ 26-ամյա երիտասարդ Առուշ Առուշանյանը ընկերների հետ հաղթանակն է տոնել, խնջույքից հետո գինովցած երիտասարդները ծեծկռտուք են սարքել: Առուշ Առուշանյանը եւ նրա թիմակիցները հարձակում են գործել Գորիսի բնակիչ Շահում Դավթյանի տան վրա այն բանի համար, որ վերջինս ընտրություններում սատարել է Աշոտ Արսենյանին:Սակայն Դավթյանին տանը չհայտնաբերելով՝ հարվածներ են հասցրել Դավթյանի կնոջ ձեռքերին: Սակայն պնդումներ կային, որ միջադեպի դրդապատճառներն իրականում ավելի խորն են եղել. դրանք առնչվում են նաեւ Սյունիքի նախկին մարզպետ Սուրիկ Խաչատրյանի գործոնի հետ: Առուշանյանների եւ Խաչատրյանի հարաբերությունները լարված են եղել դեռ նրա մարզպետ եղած ժամանակաշրջանում: Սուրիկ Խաչատրյանի վարորդի տղան ծեծի էր ենթարկել Առուշ Առուշանյանի հորը պատկանող շինանյութի խանութի աշխատակիցներից մեկին: Դավթյանը Խաչատրյանի մտերիմը լինելով է պաշտպանել Արսենյանին: Դառնալով պատգամավոր՝ Առուշանյանը փորձել է վրեժխնդիր լինել ոխերիմ հակառակորդի մտերիմից: Մեծ աղմուկ բարձրացրած այս միջադեպը չներվեց նորաթուխ պատգամավորին եւ ինքնաբացարկի դիմում պարտադրվեց: Սակայն մամուլը շարունակեց գրել, որ մարզպետ Հակոբյանը Առուշանյանի խոցված ինքնասիրությունը վերականգնելու համար այլ հատուցում է խոստացել՝ ի դեմս Գորիսի քաղաքապետի պաշտոնի: Եւ ահա, այսօր վարչապետ Կարեն Կարապետյանի 2017 թ. սեպտեմբերի 14-ի որոշմամբ` Գորիս համայնքի ղեկավարի պաշտոնակատար է նշանակվել Առուշ Առուշանյանը: Իսկ որ Գորիսի արդեն նախկին քաղաքապետ Ադոնցը պարտադրված է հեռացել պաշտոնից, վկայում են իր իսկ հայտարարությունները, որ նա անում էր մեկ-երկու ամիս առաջ:Ադոնցը հայտարարում էր, որ որեւէ մեկն իրեն հրաժարականի դիմում չի կարող պարտադրել, եւ ինքը շարունակելու է աշխատանքը: Պաշտոնական հիմնավորման համաձայն՝ նա դիմումը գրել է առողջական խնդիրների պատճառով, սակայն հատկանշական է, որ ըստ մամուլի տեղեկությունների Գորիսի ավագանու անդամներից երկուսը, որոնք Ադունցի ազգականներն են դեմ են եղել այդ որոշմանը, որը ավագանուն է ներկայացվել երկու օր առաջ: Սա եւս փաստում է, որ Ադունցը հեռացել է ոչ ինքնակամ: Փաստն այն է, որ իշխող վարչակարգը հերթական անգամ ապացուցեց, որ Հայաստանում ընտրական համակարգը, ընտրությունները եւ ժողովրդի կամարտահայտությունն առոչինչ են: Նույնիսկ ընտրովի պաշտոնների տեր ու տիրակալները իշխանություններն են ու նրանց առեւտրային մտածողությունը: Անի Սահակյան