Կասկածելի «քամիներ» Բաքվից` Մոսկվա

Բազմիցս անդրադարձել ենք` Ադրբեջանի ԵԱՏՄ-ին անդամակցելու թեմային: Այս թեմայով մի քանի անգամ խոսել են Ադրբեջանի իշխանությունները, թե՛ երկրի նախագահը, թե՛ ԱԳ նախարարը: Բաքուն ակնհայտորեն ձգում է ԵԱՏՄ-ին անդամակցության հարցում որոշում կայացնելու պրոցեսը: Ես դա հասկանալի է, թերևս, այստեղ լավ են հասկանում, թե ինչ է նշանակում մտնել ամբողջությամբ ռուսական ազդեցության գոտին` դրանից բխող հետևանքներով: Մոսկվան էլ ամիսներ առաջ` ԱԳ նախարար Լավրովի մակարդակով արծարծեց այս թեման, ակնհայտորեն ցույց տալով այն ձգտումը, թե որքան է ՌԴ-ն ցանկանում, որպեսզի Ադրբեջանն անդամակցի ԵԱՏՄ-ին: Ու այս ֆոնին, ուշագրավ է, որ սկսել են դժգոհություններ հնչել Բաքվից` Ռուսաստանի ուղղությամբ: Պատճառը` Մարիա Զախարովայի մի հայտարարությունն էր: «ԵԱՀԿ Մինսկի խմբի՝ արդեն նախկին համանախագահ Ռիչարդ Հոգլանդի հայտարարության մեջ որևէ նոր բան չկա», ասել է Ռուսաստանի արտգործնախարարության խոսնակ Մարիա Զախարովան, ընդգծելով, որ նույն սկզբունքների մասին բազմիցս նշվել է նաև ղարաբաղյան խնդրի շուրջ Ռուսաստանի, Միացյալ Նահանգների և Ֆրանսիայի նախագահների հայտարարություններում: Հիշեցնենք՝ պաշտոնին հրաժեշտ տվող Ռիչարդ Հոգլանդը փաստաթուղթ հրապարակեց, որտեղ, ինչպես ասված է փաստաթղթի գլխագրում` շարադրված են «վեց տարրեր (վերցված Մադրիդյան սկզբունքներից) որոնք անհրաժեշտ են Լեռնային Ղարաբաղում կայուն համաձայնության հաստատման համար»: Հիմա Բաքվում Մոսկվային մեղադրում են ԼՂ հարցում Հայաստանի դիրքորոշմանն աջակցելու մեջ: Ադրբեջանի արտաքին գործերի նախկին նախարար Թոֆիկ Զուլֆուգարովը Ռուսաստանի Դաշնության արտաքին գործերի նախարարության պաշտոնական ներկայացուցիչ Մարիա Զախարովային մեղադրել է Լեռնային Ղարաբաղի հակամարտության հարցում Հայաստանի դիրքորոշմանն աջակցելու մեջ: Ադրբեջանի ԱԳ նախկին նախարարը նաև պահանջել է այդ երկրի ներկայիս արտաքին գործերի նախարար Էլմար Մամեդյարովի հրաժարականը: Դրա համար հիմք է հանդիսացել ՌԴ ԱԳՆ պաշտոնական ներկայացուցիչ Մարիա Զախարովայի մեկնաբանությունը` կապված ԵԱՀԿ Մինսկի խմբի ամերիկացի արդեն նախկին համանախագահ Ռիչարդ Հոգլանդի հայտարարության հետ, ով ներկայացրել էր ԼՂ հակամարտության կարգավորման հիմնական դրույթները: Զախարովայի մեկնաբանությունն էլ առաջացրել է Զուլֆուգարովի դժգոհությունը: Ադրբեջանի ԱԳ նախկին նախարարը «Ֆեյսբուք»-ի իր էջում գրել է, որ Մարիա Զախարովայի մեկնաբանությունը համընկնում է Հայաստանի արտաքին գործերի նախարար Էդվարդ Նալբանդյանի հայտարարության հետ: Նա նաև քննադատել է Ադրբեջանի արտաքին գործերի նախարար Էլմար Մամեդյարովին և մեղադրել նրան այս իրավիճակում լռություն պահպանելու մեջ: Կասկածելի «քամիներ» են սկսել փչել Բաքվից` դեպի Մոսկվա: Չլինի՞ Ռուսաստանը ճնշումներ է գործադրում Ադրբեջանի նկատմամբ` ԵԱՏՄ-ին անդամակցելու համար... Թամար Բագրատունի