Լիցենզավորման գրանցամատյանները կդառնան էլեկտրոնային

Այսօր Ազգային ժողովի հերթական նիստին քննարկվում է «Լիցենզավորման մասին» Հայաստանի Հանրապետության օրենքում փոփոխություններ կատարելու մասին և կից ներկայացված նախագծերի փաթեթը: Նախագծի հիմնական զեկուցող, ՀՀ արդարադատության նախարարի տեղակալ Արթուր Հովհաննիսյանն ասաց, որ նախագծերի փաթեթը մշակվել ՀՀ հակակոռուպցիոն  ռազմավարակության 2015-18 թվականների միջոցառումների ծրագրի շրջանակներում: Ինչպես ասաց՝  առաջարկում են լիցենզավորման գրանցամատյանները և գործունեության  իրականացման հաշվառման գրանցամատյանները վարել էլեկտրոնային եղանակով, ինչպես նաև՝ այդ բոլոր գրանցամատյանները միացնել ու ստեղծել նաև մեկ միասնական գրանցամատյան, ու այդ ամբողջ տեղեկատվությունն արձանագրել այդ գրանցամատյաններում, իսկ գրանցամատյանում ցանկացած փոփոխություն պետք է արվի էլեկտրոնային եղանակով, և հետագայում շատ հեշտ կարելի է հսկել ու հետևել, թե ինչ փոփոխություն է կատարվել, և ով է դա կատարել: «Այս փոփոխությամբ մենք բնակչության վրա լրացուցիչ բեռ չենք դնում, ընդհակառակը, փոփոխություն է կատարվում զուգահեռաբար նաև պետական տուրքի մասին օրենքում, որտեղ նախատեսվում է, որ էլեկտրոնային, առցանց եղանակով տեղեկատվության ստացման համար կգանձվի ոչ թե 3000 դրամ, ինչպես նախատեսված է փաստաթղթային եղանակով տեղեկատվություն ստանալու համար, այլ ընդամենը  1000 դրամ, դրան կգումարվի նաև որոշակի գումար էլեկտրանային եղանակով այդ տեղեկատվությունն  ուղարկելու ծառայության համար, սակայն այս երկու գումարները իրար հետ ավելի փոքր գումար են կազմում, քան այսօր թղթային եղնակով տեղեկատվությունը ստանալու համար է: Սա շատ կարևոր փաստաթուղթ է»: