Ինչպիսի հոգատարություն. Մոսկվան շտապեց փրկել Ալիևին
Ռուսաստանի ԱԳՆ-ն`իր պաշտոնական ներկայացուցիչ Մարիա Զախարովայի հայտարարությամբ անդրադարձել է The Guardian պարբերականում լույս տեսած աղմկահարույց հոդվածին` «Ադրբեջանական լվացքատան» մասին, որը բացահայտում էր Ադրբեջանի իշխանությունների կողմից փողերի լվացման և եվրոպացի պատգամավորներին կաշառելու խայտառակ դեպքերը: «Կատարվածը նշանակում է, որ Արևմուտքը ճնշում է գործադրում Ռուսաստանի դաշնակիցների վրա: Ինձ թվում է՝ դա նշանակում է, որ շատ ուժեղ տեղեկատվական ճնշում է գործադրվում մի քանի ուղղություններով: Դա աշխատանք է՝ ուղղված ռուս լրագրողների դեմ... Այն իրականացվում է մեծ թվով կեղծ լուրերի, արբանյակային ցանցերի միջոցով և այլն»,- ասել է Մարիա Զախարովան: Հիշեցնենք, որ Կոռուպցիայի և կազմակերպված հանցավորության հետաքննությամբ զբաղվող կենտրոնի` OCCRP-ի բացահայտած փաստերով պարզվել է, որ Ադրբեջանի իշխող էլիտայի գաղտնի «սև դրամարկղը» նախատեսված է եղել ոչ միայն եվրոպացի քաղաքական գործիչներին կաշառելու համար, այլև «սև դրամարկղ»-ում վճարում է կատարել «Ռոսօբորոնէքսպորտ»-ը՝ ռազմատեխնիկայի վաճառքի ռուսական ընկերությունը: Փաստորեն, Մոսկվան Ադրբեջանի նկատմամբ արևմտյան լրագրողների բացահայտումները, համարում է ոչ միայն կեղծիք, այլև հարձակում իր վրա, «ճնշման գործադրում Ռուսաստանի դաշնակիցների նկատմամբ»: Ինչպիսի հոգատարություն... Մոսկվան, փաստորեն, ստանձնում է Ալիևի կեղտոտ «լվացքատան» օմբուդսմենի դերը: Ինչ խոսք, առանձնապես զարմանալու առիթ էլ չկա: Իսկ ի՞նչ էր անում Մոսկվան, երբ ողջ քաղաքակիրթ աշխարհը ղարաբաղյան հակամարտության սրումը դատապարտեց ապրիլյան պատերազմից հետո... Մոսկվան շարունակում է նույն ոգով զինել Ադրբեջանին, մատակարարել զենքի վաճառքով պայմանագրով նախատեսված զինտեխնիկաները, կարծես, ապրիլյան պատերազմ չի էլ եղել: Տարօրինակ ոչինչ չկա, պարզապես, ցավալին այն է, որ Հայաստանում էլ դեռ այսօր մարդիկ կան, նաև իշխող վերնախավում, ովքեր կարծում են, թե Ռուսաստան-Ադրբեջան հարաբերությունները, երբեք չեն կարող արդյունավետ լինել: Մինչդեռ վերջին տարիները ցույց են տալիս, որ Ադրբեջանը ոչ միայն Ռուսաստանի համար «վստահելի գործընկեր է», այլև` Ալիևն ամբողջությամբ գտնվում է Պուտինի պաշտպանության և հովանու ներքո: Մետաքսյա Շալունց