Իվան Վոլինկինը նեղսրտեց

Հայաստանում Ռուսաստանի դեսպան Իվան Վոլինկինը, պատասխանելով հարցին՝ արդյոք հայ-չինական ռազմատեխնիկական համագործակցությունը կարող է ազդել հայ-ռուսական դաշնակցային հարաբերությունների վրա, նշեց, որ հայ-չինական ռազմատեխնիկական համագործակցությունը Հայաստանի որոշումն է: «Հայաստանն է որոշում՝ ում հետ համագործակցել, և Ռուսաստանում ոչ ոք դա չի քննադատում»,- ասաց դեսպանը: Դիտարկմանը, որ Ռուսաստանը զենք է մատակարարում Հայաստանի ու Արցախի հետ պատերազմի մեջ գտնվող Ադրբեջանին, բայց միաժամանակ նախագահ Վլադիմիր Պուտինը քննադատում է Արևմուտքին՝ Ուկրաինային զենք մատակարարելու հարցում՝ Վոլինկինն ասաց. «Էթիկապես ճիշտ չէ դիվանագետին մեկնաբանել իր նախագահի խոսքերը»։ Հիշեցնենք, որ օրեր առաջ BRICS (Բրազիլիա, Ռուսաստան, Հնդկաստան, Չինաստան ու ՀԱՀ) անդամ երկրների գագաթաժողովի արդյունքներն ամփոփող ասուլիսում Վլադիմիր Պուտինը արձագանքել էր ԱՄՆ-ի կողմից Ուկրաինա զենք մատակարարելու փաստին։ «Միացյալ  նահանգների սուվերեն իրավունքն է որոշել՝ ում զենք վաճառել կամ անվճար տրամադրել»,- հայտարարել է Ռուսաստանի նախագահը՝ քննադատելով ԱՄՆ-ին՝ ռազմական գործողությունների գոտի՝ Ուկրաինա զենք մատակարարելու համար։ Սակայն Հայաստանում Ռուսաստանի դեսպանին դուր չեկավ, երբ լրագրողների հարցերն այս թեմայի շուրջ, հատկապես, երբ  հարցրեցին, թե  ինչպես է պատահում, որ հակամարտության գոտի զենք մատակարարողը քննադատում է մեկ այլ պետության նույն բանի մեջ. «Դուք այլ թեմաներ ունե՞ք, ինչքան կարելի է դրա մասին խոսել, այդտեղ ամեն ինչ հասկանալի է, Ռուսաստանի ղեկավարությունն  այդ հարցի շուրջ արտահայտվել է»: