Ծառուկյանը դիրքավորվում է ու չի բացում խաղաքարտերը

Վեցերորդ գումարման Ազգային ժողովի աշնանային նստաշրջանը բավականին հետաքրքիր մեկնարկեց: Նախ հայտնվեց Իշխան Զաքարյանը՝ խոստանալով՝ «Այսուհետ գալու եմ նիստերին»: Ծառուկյան դաշինքի պատգամավորը ընտրվելուց հետո առաջին անգամ էր եկել խորհրդարան: Ընտրություններին առանցքային դերակատարում ստանձնած Զաքարյանի եւ Ծառուկյանի հարաբերություններն ինչ-որ փուլում վատացան, լուրեր կային, որ հնարավոր է Իշխան Զաքարյանը մանդատը վայր դնի, քանի որ նա սերտորեն շփվում է Ռոբերտ Քոչարյանի հետ, ինչպես նաեւ կազմակերպել է դաշինքի այն պատգամավորների մանդատը հետ վերցնելու գործընթացը, որոնք հայտնվել էին Ծառուկյանի սեւ ցուցակում: Իշխան Զաքարյանը, իհարկե, հերքեց բոլոր այս լուրերը, ավելին ցուցադրական բեմականացում տեղի ունեցավ Իշխան Զաքարյանի եւ Գագիկ Ծառուկյանի միջեւ, ի դեպ, վերջինս նույնպես խորհրդարան էր եկել, նրանք միմյանց հետ ջերմ շփվեցին՝ ի հեճուկս լրագրողների: Սակայն նույն անկաշկանդությամբ Ծառուկյանը չպատասխանեց լրագրողների՝ իրեն ուղղված հարցերին: Մինչ ներքաղաքական հարթությունում թեպետ քողարկված, բայց թեժ պայքար է գնում 2018-ի վարչապետ դառնալու հարցի շուրջ, եւ արդեն իսկ իշխանական ու մերձիշխանական շրջանակները դիրքորոշում են ճշտում՝ Սերժ Սարգսյանի կողմն են անցնում, թե Կարեն Կարապետյանի, Ծառուկյանը համառորեն չբացեց խաղաթղթերը, թե ում կողմն է նա անցնում: Նա համառորեն շրջանցեց հարցը՝ եթե Սերժ Սարգսյանը վարչապետի թեկնածություն առաջադրի, կլինի այդ թեկնածուն, կամ անձամբ Սերժ Սսարգսյանը դաշինքի համար ընդունելի թեկնածու: «Ես ուզում եմ «եթե»-ով հարցերին չպատասխանել, երբ ՀՀԿ-ն իր որոշումը կկայացնի, իր թեկնածուին կառաջադրի՝ այն ժամանակ կասենք»: Իսկ արդյոք «Ծառուկյան դաշինքը» կունենա վարչապետի սեփական թեկնածուն՝ Գ. Ծառուկյանը նշեց, որ այդ իրավունքը տրված է ՀՀԿ-ին. «Խորհրդարանական ընտրությունների ժամանակ իրենք տարել են առավելագույն ձայներ՝ 50+1: Որոշողը, առաջարկողը իրենք են»:  Ճշտմանը՝ իրենք չեն խոչընդոտի Սերժ Սարգսյանի վարչապետ դառնալու ծրագիրը, ինչպես խոստանում են ընդդիմադիր գործընկերները, Ծառուկյանը պատասխանեց.<<Խոչընդոտողը պետք է լիներ ժողովուրդը, եթե մեր ժողովուրդն իր ձայնով գնացել է 50+1 տոկոսը տվել է ՀՀԿ-ին, հենց ՀՀԿ-ն էլ պատասխանատու է երկրի, ժողովրդի անվտանգության համար: Ես համապատասխան քարոզարշավի ժամանակ մեր ժողովրդին ներկայացրել էի՝ ժողովուրդ ջան, հավաքվելով ու ասելով՝ Ծառուկյան փրկի, ես ասել եմ՝ ձեր ցավը տանեմ, տվեք փրկեմ: Ասում եմ խնդիրները, լուծումները, 15 կետերը, ծրագրերը, որ համակարգ փոխվի, մարդիկ փոխվեն, ասում էի ներդրումների բերման աղբյուրը: Ասում էին՝ Ծառուկյանը բլեֆ է արել: Համապատասխան մարդը հելավ հեռուստացույցի մոտ ասեց, որ՝ մենք պատրաստ ենք Ծառուկյանի ծրագիրն իրականություն դարձնենք>>: Լրագրողները նաև հետաքրքրվեցին, թե ինչ կարծիք ունի Ծառուկյանը՝ վարչապետ Կարեն Կարապետյանի կառավարության աշխատանքից, սակայն Ծառուկյանը կրկին չտրվեց լրագրողների սադրանքներին: ԲՀԿ առաջնորդը ընդգծեց, որ Կ. Կարապետյանն իր ընկերն է, ներկայացրել է ծրագիր և կոռեկտ չի համարում ընկերոջ մասին կարծիք հայտնել. «Ես ութ ամիս առաջ եմ ասել, որ Կարեն Կարապետյանն իմ ընկերն է, ինքը ներկայացրել է ծրագիրը, աշխատում է անել: Էսօր ընկերն ընկերոջ մասին կարծիք ասելը դա ես կոռեկտ չեմ համարում: Երբ որ մենք իրար հետ հանդիպում ենք, ես ասում եմ բացասականն էլ, դրականն էլ: Այսօր դրականը նկատելի է, որ 25-30 տոկոս բանկի տոկոսները դառել են 8-10 տոկոս, և այսօր տուրիստների քանակի աճն արդեն 25 տոկոսից ավելի է: Ինքը կներկայացնի համապատասխան իր տարվա կատարած գործերը, ըստ այդմ էլ մենք կասենք»,- նշեց Գագիկ Ծառուկյանը: Ակնհայտ է, որ քաղաքական դաշտում դիրքավորման փուլ է եւ անգամ Ծառուկյանը չի ցանկանում իր աջակցությունը հայտնել <<նախագահ ջանին>>: Անի Սահակյան