Թուրք ֆուտբոլիստին սպառնում է մինչև 4 տարվա ազատազրկում

Թուրքական T24 առցանց թերթի փոխանցմամբ՝ Թուրքիայի ֆուտբոլային հավաքականի լավագույն ռմբարկու (112 խաղ, 51 գոլ), իշխող «Արդարություն ու զարգացում» կուսակցության (ԱԶԿ) նախկին պատգամավոր Հաքան Շուքյուրին սպառնում է 1-4 տարվա ազատազրկում։ Դրա համար պատճառ է հանդիսացել Twitter-ում 44-ամյա Շուքյուրի արած գրառումը, որը որակվել է որպես երկրի նախագահ Ռեջեփ Էրդողանին վիրավորանք։ Ընդգծվում է, որ Շուքյուրն այդ գրառումն արել է 2015 թվականի փետրվարի 15-ին։ Բաքըրքյոյի դատախազի տեղակալ Իդրիս Քուրթն արդեն իսկ պատրաստել է Շուքյուրի հանդեպ մեղադրականը՝ ընդգծելով, որ Շուքյուրը վիրավորել է ոչ միայն նախագահ Ռեջեփ Թայիփ Էրդողանին, այլև նրա որդի Բիլալ Էրդողանին։ Հիշեցնենք, որ 2013 թվականի վերջին Թուրքիան ցնցած «Մեծ կաշառք» գործից և դրան հաջորդած Էրդողան-Գյուլեն առճակատման (ինչպես նաև ընդհանրապես Էրդողանի վարած քաղաքականության հետևանքով) ԱԶԿ-ական մի շարք պատգամավորներ մեկուկես տարում լքել էին կուսակցության շարքերը` դառնալով անկախ պատգամավորներ։ Նրանց թվում հայտնվել էր նաև ճանաչված ֆուտբոլիստ Հաքան Շուքյուրը, որին Էրդողանը կոչ էր արել վայր դնել իր մանդատը՝ նրան հիշեցնելով, որ Շուքյուրը խորհրդարանում է հայտնվել ԱԶԿ-ի շարքերում ընդգրկվելու շնորհիվ։ Շուքյուրը սակայն մերժել էր նրան։