Թուրքական դատախազությունը պահանջել է Սեբահաթ Թունջելին դատապարտել 8 տարով

Dünya Bülteni լրատվական կենտրոնի փոխանցմամբ՝ թուրքական դատախազությունը պատրաստել է 4 տարբեր գործերով քրդամետ «Ժողովուրդների դեմոկրատական» կուսակցության (ԺԴԿ) նախկին ներկայացուցիչ Սեբահաթ Թունջելի դեմ մեղադրականը։ Դրանում պահանջվում է Թունջելին դատապարտել 8 տարվա ազատազրկման։ Թունջելը մասնավորապես մեղադրվում է 2008, 2009, 2010 թվականներին «Քրդստանի աշխատավորական» կուսակցությանը (PKK) գովաբանելու համար։ Ընդգծվում է, որ Թունջելի նկատմամբ դատավարությունը կսկսվի առաջիկա օրերին։ Հիշեցնենք, որ 2015 թվականի նոյեմբերին Սեբահաթ Թունջելը ձերբակալվեց Ստամբուլի Աթաթուրքի անվան օդանավակայանում։ Նրան արգելեցին լքել երկիրը, ինչից հետո ազատ արձակեցին։ Միջադեպը գրանցվել էր Ստամբուլից Բրյուսել մեկնելիս։ Այն կապված է 2010 և 2013 թվականներին Թուրքիայի ներքաղաքական զարգացումների վերաբերյալ նրա թվիթերյան գրառումների հետ։ Թունջելը 2011 թվականի մարտի 21-ին (Նովրուզ) Շըրնաքի նահանգի Սիլոփի շրջանում ապտակել էր թուրք ոստիկանապետին, իսկ այս տարվա ամռանը հայտարարել էր, թե շատերը ցանկացել են համբուրել իր ձեռքը, որով նա ապտակ է հասցրել ոստիկանապետին։ Նոյեմբերին Թունջելին արդարացրին «ահաբեկչական կազմակերպության օգտին քարոզչություն կատարելու համար» գործով, որով նրան սպառնում էր 1-5 տարվա ազատազրկում։ 2012 թվականի մայիսի 3-ին Թունջելը մասնակցել էր քրդական Խաղաղություն և ժողովրդավարություն կուսակցության (ԽԺԿ) «ազատության խլման» հանրահավաքին և ելույթ էր ունեցել։